بارڈر گارڈ بنگلہ دیش (بی جی بی) نے جنوب مشرقی ضلع بندربن میں بنگلہ دیش اور میانمار کے درمیان سرحد کے قریب انسداد اسمگلنگ کی ایک خصوصی کارروائی کے دوران ایک لاکھ سے زائد یابا گولیاں برآمد کر لی ہیں۔
بی جی بی حکام کے مطابق جمعہ کی صبح مقامی وقت کے مطابق تقریباً ساڑھے 7 بجے نائکھونگ چھڑی بٹالین کے تحت جارولیاچھڑی بارڈر آؤٹ پوسٹ کے گشتی دستے نے سرحدی ستون سے تقریباً 200 گز اندر پوابان علاقے میں چھاپہ مار کارروائی کی۔
بارڈر فورس کے مطابق گشتی ٹیم کی موجودگی کا احساس ہوتے ہی مشتبہ اسمگلر قریبی پہاڑی جنگلات کی جانب فرار ہو گئے اور موقع پر 2 بیگ چھوڑ گئے۔
یہ بھی پڑھیں: پاکستان اور بنگلہ دیش کے درمیان منشیات کے خلاف تعاون کا معاہدہ
بعد ازاں بیگوں کی تلاشی لینے پر میانمار سے لائی گئی 100,841 یابا گولیاں برآمد ہوئیں، جنہیں 10 بنڈلوں میں پیک کیا گیا تھا۔
حکام نے ضبط شدہ منشیات کی مالیت تقریباً 3 کروڑ 2 لاکھ 50 ہزار ٹکا یعنی تقریباً 2 لاکھ 45 ہزار امریکی ڈالر سے زائد بتائی ہے۔
کمانڈنگ آفیسر لیفٹیننٹ کرنل محمد فیض الکبیر نے کارروائی پر تبصرہ کرتے ہوئے کہا کہ بارڈر گارڈ سرحدی تحفظ، اسمگلنگ اور انسانی اسمگلنگ کی روک تھام، غیر قانونی سرحدی آمدورفت کی نگرانی، غیر قانونی اسلحے کی برآمدگی اور منشیات کی اسمگلنگ کے خلاف باقاعدگی سے آپریشنز جاری رکھے ہوئے ہے۔
مزید پڑھیں: بارڈر گارڈ بنگلہ دیش کی بڑی کارروائی، کروڑوں روپے مالیت کی منشیات ضبط
انہوں نے کہا کہ بنگلہ دیش حکومت کی منشیات کے خلاف ‘زیرو ٹالرنس’ پالیسی پر سختی سے عمل کیا جا رہا ہے، جبکہ سرحدی فورس ہر وقت الرٹ رہتے ہوئے نگرانی اور خفیہ معلومات کی بنیاد پر کارروائیاں جاری رکھے ہوئے ہے تاکہ سرحد پار اسمگلنگ کی سرگرمیوں کو روکا جا سکے۔
بنگلہ دیش اور میانمار کے درمیان سرحد کو طویل عرصے سے یابا اسمگلنگ کے ایک اہم راستے کے طور پر دیکھا جاتا ہے، جہاں سیکیورٹی فورسز ملک میں داخل ہونے والی منشیات کی کھیپوں کو روکنے کے لیے مسلسل کارروائیاں کرتی رہتی ہیں۔
