وزیراعظم پاکستان میاں شہباز شریف نے کہا ہے کہ پاکستان کی مسلسل اور بھرپور سفارتی و ثالثی کوششوں کے نتیجے میں ایک اہم امن معاہدہ تکمیل کے قریب پہنچ چکا ہے، تاہم بعض عناصر اس عمل کو سبوتاژ کرنے کے لیے مسلسل گمراہ کن معلومات اور پروپیگنڈا پھیلا رہے ہیں۔
Amid ongoing intense mediation efforts by Pakistan, we are fully aware of incessant misinformation campaign being waged by those who want to sabotage the peace deal. Setting aside the noise, we can confirm that a final, agreed upon text of the peace deal has been reached and…
— Shehbaz Sharif (@CMShehbaz) June 12, 2026
سماجی رابطے کی ویب سائٹ ایکس (سابقہ ٹوئٹر) پر اپنے پیغام میں وزیراعظم نے کہا کہ پاکستان جاری شدید ثالثی کوششوں کے دوران ان تمام غلط معلومات پر مبنی مہمات سے بخوبی آگاہ ہے جو امن معاہدے کو نقصان پہنچانے کے لیے چلائی جا رہی ہیں۔
وزیراعظم نے اپنے پیغام میں کہا کہ ’ شور و غوغا اور افواہوں کو ایک طرف رکھتے ہوئے ہم تصدیق کر سکتے ہیں کہ امن معاہدے کے حتمی اور متفقہ متن پر اتفاق ہو چکا ہے اور پاکستان اب دونوں فریقوں کے ساتھ مل کر اگلے مراحل کو حتمی شکل دینے کے لیے قریبی رابطے میں ہے‘۔ انہوں نے مزید کہا کہ امن آج جتنا قریب ہے، اس سے پہلے کبھی نہیں تھا‘۔
وزیراعظم نے اپنی اس پوسٹ میں متعدد عالمی شخصیات اور متعلقہ رہنماؤں کو بھی ٹیگ کیا، جن میں امریکی صدر ڈونلڈ ٹرمپ، نائب صدر جے ڈی وینس، امریکی وزیر خارجہ مارکو روبیو، خصوصی ایلچی اسٹیو وٹکوف، امن مشنز کے نمائندے، ایران کے صدر ڈاکٹر مسعود پزشکیان اور ایرانی وزیر خارجہ عباس عراقچی شامل ہیں۔
وزیراعظم نے اگرچہ امن معاہدے میں شامل فریقوں کی تفصیلات بیان نہیں کیں، تاہم ان کے بیان سے ظاہر ہوتا ہے کہ پاکستان کی ثالثی کے نتیجے میں سفارتی سطح پر اہم پیش رفت حاصل ہوئی ہے۔
واضح رہے کہ وزیراعظم کا بیان خطے میں امن و استحکام کے فروغ اور مذاکراتی عمل میں پاکستان کے فعال کردار کی عکاسی کرتا ہے۔ معاہدے اور اس کے نفاذ سے متعلق مزید تفصیلات آئندہ دنوں میں سامنے آنے کی توقع ہے۔
