نائب وزیراعظم اور وزیر خارجہ اسحاق ڈار نے امریکا اور ایران کے درمیان طے پانے والی مفاہمت کا خیرمقدم کرتے ہوئے اسے سفارتکاری اور مذاکرات کی کامیابی قرار دیا ہے۔
سوشل میڈیا پلیٹ فارم ایکس پر جاری اپنے بیان میں اسحاق ڈار نے کہا کہ امریکا اور اسلامی جمہوریہ ایران کے درمیان حاصل ہونے والی یہ اہم پیش رفت مسلسل سفارتی رابطوں اور دوست ممالک کے اس عزم کی عکاس ہے کہ تنازع اور محاذ آرائی کے بجائے مکالمے کا راستہ اختیار کیا جائے۔
یہ بھی پڑھیں: امریکا ایران جنگ بندی معاہدہ، ’پاکستان نے ثابت کر دیا کہ وہ امن کا سفیر ہے‘
انہوں نے کہا کہ یہ پیش رفت عالمی برادری کے لیے ایک حوصلہ افزا پیغام ہے اور اس سے عالمی منڈیوں اور عالمی معیشت کو درکار اعتماد اور استحکام ملے گا، خصوصاً ان ترقی پذیر ممالک کو جو علاقائی عدم استحکام سے سب سے زیادہ متاثر ہوتے ہیں۔
وزیر خارجہ نے کہا کہ اس پورے عمل کے دوران پاکستان تمام متعلقہ فریقوں کے ساتھ فعال رابطے میں رہا اور مسلسل تحمل، تعمیری روابط اور مذاکرات کی حمایت کرتا رہا۔
Pakistan warmly welcomes the understanding reached between the United States and the Islamic Republic of Iran.
This significant breakthrough reflects the power of sustained diplomatic engagement and the collective resolve of friendly nations to choose dialogue over…
— Ishaq Dar (@MIshaqDar50) June 15, 2026
ان کا کہنا تھا کہ پاکستان کا ہمیشہ یہ مؤقف رہا ہے کہ تمام مسائل کا پائیدار حل صرف مکالمے اور سفارت کاری کے ذریعے ہی ممکن ہے۔
اسحاق ڈار نے امریکا اور ایران کی قیادت کی جانب سے پاکستان پر کیے گئے اعتماد کو سراہتے ہوئے دونوں ممالک کی اس عزم کے لیے تعریف کی کہ وہ پرامن اور مذاکراتی حل کے حصول کے لیے رابطے میں رہے۔
مزید پڑھیں: اسرائیلی حملے کے باعث امریکا ایران معاہدے پر دستخط کی تقریب اب کچھ گھنٹوں بعد ہوگی، ڈونلڈ ٹرمپ
انہوں نے اس عمل میں سعودی عرب، قطر، ترکیہ، مصر اور دیگر برادر ممالک کے علاوہ اقوام متحدہ اور بین الاقوامی شراکت داروں کی سفارتی کوششوں کو بھی خراج تحسین پیش کیا، جنہوں نے اس اہم پیش رفت کے حصول میں کلیدی کردار ادا کیا۔
وزیر خارجہ نے کہا کہ زیر التوا امور پر مذاکرات کے جاری رہنے کے دوران پاکستان اس پیش رفت کو مزید مستحکم بنانے کے لیے ہر ممکن تعاون فراہم کرنے کے لیے تیار ہے۔
انہوں نے امید ظاہر کی کہ 19 جون کو جینیوا میں ہونے والی باضابطہ دستخطی تقریب اس مثبت پیش رفت کو مزید تقویت دے گی اور خطے سمیت پوری دنیا میں دیرپا امن، استحکام اور مشترکہ خوشحالی کی راہ ہموار کرے گی۔
