فیفا ورلڈ کپ 2026 میں اسپین کے خلاف شاندار کارکردگی دکھا کر شہرت حاصل کرنے والے کیپ وردے کے گول کیپر ووزینا کی والدہ کو امریکا لانے کے لیے امریکی محکمہ خارجہ نے اقدامات شروع کر دیے ہیں۔
مزید پڑھیں:فیفا ورلڈ کپ 2026: کیپ ورڈے کے گول کیپر کے چند گھنٹوں میں لاکھوں فالوورز بڑھ گئے
ووزینا نے اسپین کے خلاف تاریخی ڈرا کے بعد میڈیا سے گفتگو میں کہا تھا کہ ان کی والدہ ویزا اخراجات اور دیگر سفری دستاویزات کے مسائل کے باعث میچ دیکھنے امریکا نہیں آ سکیں۔ انہوں نے خواہش ظاہر کی کہ ان کی والدہ بھی ان کے میچز اسٹیڈیم میں بیٹھ کر دیکھ سکیں۔
The US State Department is trying to help get Cape Verde goalkeeper Vozinha’s mother to the United States to watch her son play in the World Cup, a State Department official said. https://t.co/VlsPDHmJZl pic.twitter.com/0PtZrUBnXy
— CNN (@CNN) June 16, 2026
اس معاملے پر امریکی محکمہ خارجہ کے ایک عہدیدار نے بتایا کہ ووزینا کی والدہ کی جانب سے تاحال ویزا درخواست کا کوئی ریکارڈ موجود نہیں، تاہم فیفا ورلڈ کپ میں شریک کھلاڑیوں کے قریبی رشتہ دار ویزا بانڈ سے مستثنیٰ ہیں اور محکمہ خارجہ ووزینا کے خاندان سے رابطہ کرکے ویزا عمل میں مدد فراہم کر رہا ہے۔
ذرائع کے مطابق ووزینا کی والدہ کے پاس اس وقت فعال پاسپورٹ موجود نہیں اور وہ پاسپورٹ حاصل کرنے کے مراحل سے گزر رہی ہیں۔
40 سالہ ووزینا نے اسپین کے خلاف میچ میں 7 شاندار سیوز کرکے اپنی ٹیم کو تاریخی نتیجہ دلانے میں اہم کردار ادا کیا۔ اس کارکردگی کے بعد ان کی مقبولیت میں غیرمعمولی اضافہ ہوا ہے اور ان کے انسٹاگرام فالوورز کی تعداد چند گھنٹوں میں قریباً 50 ہزار سے بڑھ کر 97 لاکھ سے تجاوز کر گئی ہے۔
کیپ وردے اپنا اگلا میچ اتوار کو یوراگوئے کے خلاف میامی میں کھیلے گا۔
