معروف مذہبی اسکالر مولانا طارق جمیل اور متنازع انفلوئنسر کاشف ضمیر کی حالیہ ملاقات سوشل میڈیا پر توجہ کا مرکز بن گئی ہے۔ کاشف ضمیر نے ملاقات کے دوران مولانا طارق جمیل کو رولیکس گھڑی تحفے میں دی جس کی ویڈیو انہوں نے اپنے انسٹاگرام اکاؤنٹ پر شیئر کی۔
ویڈیو منظرِ عام پر آنے کے بعد سوشل میڈیا صارفین کی جانب سے مختلف ردعمل سامنے آئے ہیں۔ متعدد صارفین نے کاشف ضمیر پر تنقید کرتے ہوئے دعویٰ کیا کہ وہ ماضی میں بھی مشہور شخصیات کو مبینہ طور پر جعلی رولیکس گھڑیاں، سونے کی زیورات اور دیگر قیمتی تحائف دے چکے ہیں۔
View this post on Instagram
کئی صارفین نے تبصروں میں تحفے میں دی گئی گھڑی کی اصلیت پر سوالات اٹھائے جبکہ بعض نے اسے رولیکس کی نقل قرار دیا۔ ایک صارف نے لکھا ’مشہور شخصیات کو فرسٹ کاپی رولیکس دینا بند کریں، آپ کی ویڈیو دیکھ کر ہی پتا چل جاتا ہے کہ یہ جعلی ہے‘۔
ایک اور صارف نے مولانا طارق جمیل پر تنقید کرتے ہوئے لکھا کہ ’کیا یہی وہ شخصیت نہیں جو لوگوں کو بتاتی ہے کہ سونا حرام ہے اور دنیا و اس کی آسائشیں عارضی ہیں؟‘
یہ بھی پڑھیں: مولانا طارق جمیل نے بچے سے ہاتھ کیوں نہیں ملایا؟ بیٹے کی وضاحت سامنے آگئی
متعدد صارفین نے یہ بھی تبصرہ کیا کہ کاشف ضمیر نے مولانا طارق جمیل کو ’فولیکس‘ (جعلی رولیکس) تحفے میں دے کر دھوکا دینے کی کوشش کی ہے۔
واضح رہے کہ کاشف ضمیر ماضی میں بھی مختلف تنازعات اور سوشل میڈیا مباحث کا حصہ رہ چکے ہیں، جبکہ ان کی جانب سے معروف شخصیات کو مہنگے تحائف دینے کی ویڈیوز اکثر سوشل میڈیا پر وائرل ہوتی رہتی ہیں۔
