قومی اسمبلی نے ایران اور امریکا کے درمیان کشیدگی کے خاتمے، امن و استحکام کے لیے فریم ورک معاہدے اور اس میں پاکستان کے مثبت سفارتی کردار کو سراہتے ہوئے متفقہ قرارداد منظور کر لی ہے۔ قرارداد میں وزیراعظم، نائب وزیراعظم، عسکری قیادت اور مذاکراتی عمل میں شامل تمام افراد کی کاوشوں کو خراجِ تحسین پیش کیا گیا۔
قومی اسمبلی نے ایران اور امریکا کے درمیان ہونے والے حالیہ امن معاہدے اور دونوں ممالک کے درمیان کشیدگی کم کرنے کے لیے پاکستان کے کردار کو سراہتے ہوئے متفقہ قرارداد منظور کر لی۔
PM Shehbaz Sharif addresses National Assembly session https://t.co/GewFsMgBDs
— Pakistan TV (@PakTVGlobal) June 19, 2026
قرارداد میں کہا گیا ہے کہ قومی اسمبلی پاکستان ایران اور امریکا کے درمیان دشمنی کے خاتمے اور امن و استحکام کے لیے فریم ورک معاہدے پر دستخط کو ایک اہم اور تاریخی سفارتی پیشرفت قرار دیتی ہے۔
قرارداد میں اس امید کا اظہار کیا گیا کہ اس معاہدے کے نتیجے میں نہ صرف خطے میں امن اور استحکام کو فروغ ملے گا بلکہ عالمی سطح پر معاشی بہتری اور توانائی کے تحفظ پر بھی مثبت اثرات مرتب ہوں گے۔
قومی اسمبلی نے قرارداد کے ذریعے وزیراعظم پاکستان شہباز شریف، نائب وزیراعظم و وزیر خارجہ اسحاق ڈار، وزیر داخلہ محسن نقوی، فیلڈ مارشل عاصم منیر اور مذاکراتی عمل میں شامل تمام ٹیم کو خراجِ تحسین پیش کیا۔
قرارداد میں کہا گیا کہ ان شخصیات کی مخلصانہ، مسلسل اور انتھک کوششوں نے پاکستان کو عالمی سطح پر ایک قابلِ اعتماد ثالث اور امن کے داعی ملک کے طور پر نمایاں کیا۔
ایوان نے ایران اور امریکا کی قیادت کو بھی معاہدے کی کامیاب تکمیل پر مبارکباد پیش کی اور کہا کہ دونوں ممالک کی جانب سے سفارت کاری کو ترجیح دینا خطے کے لیے ایک مثبت پیغام ہے۔
قرارداد میں دوست ممالک کی کوششوں کو بھی سراہا گیا جنہوں نے امن عمل کی حمایت کی اور کشیدگی کم کرنے میں اپنا کردار ادا کیا۔
قومی اسمبلی نے اس موقع پر اس عزم کا اظہار کیا کہ پاکستان عالمی امن، علاقائی استحکام اور مذاکرات کے ذریعے مسائل کے حل کے لیے اپنا مثبت کردار جاری رکھے گا۔
