لاہور کی پبلک ٹرانسپورٹ میں کیو آر پینک بٹن لگانے کا مقصد خواتین اور دیگر مسافروں کو ہراسانی، جرائم یا کسی بھی ہنگامی صورتحال میں فوری مدد فراہم کرنا ہے۔ پبلک ٹرانسپورٹ میں خواتین کو ہراساں کیے جانے کے واقعات سامنے آتے رہتے ہیں، تاہم اکثر متاثرہ افراد خوف یا دیگر وجوہات کی بنا پر شکایت درج نہیں کرا پاتے۔ نئے نظام کے تحت بسوں، رکشوں، ویگنوں اور ٹیکسیوں میں نصب کیو آر کوڈ کو موبائل سے اسکین کر کے مسافر براہ راست پولیس اور سیف سٹی حکام سے رابطہ کر سکیں گے۔ شکایت موصول ہوتے ہی گاڑی کی شناخت، ڈرائیور کی تفصیلات اور مسافر کی لوکیشن قانون نافذ کرنے والے اداروں تک پہنچ جائے گی تاکہ فوری کارروائی کی جا سکے۔
حکام کے مطابق یہ اقدام نہ صرف خواتین کے تحفظ کو بہتر بنائے گا بلکہ ڈرائیورز اور دیگر مسافروں کو بھی سیکیورٹی فراہم کرے گا۔ پہلے مرحلے میں رکشوں پر یہ نظام متعارف کرایا جا رہا ہے، جس کے بعد اسے دیگر پبلک ٹرانسپورٹ ذرائع تک وسعت دی جائے گی۔ شہریوں نے اس نظام کی مؤثر نگرانی اور مستقل فعالیت کو ضروری قرار دیا ہے تاکہ ضرورت کے وقت یہ واقعی مددگار ثابت ہو سکے۔
