واٹس ایپ نے صارفین کی پرائیویسی مزید بہتر بنانے کے لیے ایک اہم فیچر متعارف کرانے کا اعلان کیا ہے، جس کے تحت اب صارفین فون نمبر کے بجائے منفرد یوزرنیم کے ذریعے ایک دوسرے سے رابطہ کر سکیں گے۔ کمپنی کے مطابق اس تبدیلی کا مقصد ذاتی موبائل نمبر کو غیر ضروری طور پر دوسروں کے ساتھ شیئر ہونے سے محفوظ رکھنا ہے۔
میٹا کی ملکیت میں موجود پیغام رسانی کی مقبول ایپ واٹس ایپ نے اعلان کیا ہے کہ جلد ہی صارفین کو فون نمبر شیئر کیے بغیر رابطہ کرنے کی سہولت فراہم کی جائے گی۔ اس مقصد کے لیے کمپنی ایک نیا یوزرنیم فیچر متعارف کرا رہی ہے، جس کے تحت ہر صارف اپنے لیے ایک منفرد یوزرنیم منتخب کر سکے گا۔
یہ بھی پڑھیے واٹس ایپ بغیر کھولے وائس نوٹس بھیجنے کی سہولت کا امکان
واٹس ایپ نے جاری اپنے بیان میں کہا کہ نئے فیچر کا بنیادی مقصد صارفین کے موبائل نمبر کی رازداری کو مزید بہتر بنانا ہے۔ اس تبدیلی کے بعد ایسے مواقع پر، جیسے کسی بڑے گروپ میں شامل ہونا یا پہلی مرتبہ کسی شخص یا کاروبار سے رابطہ کرنا، صارف کا فون نمبر خودکار طور پر دوسروں کے ساتھ شیئر نہیں ہوگا۔
کمپنی کے مطابق اس فیچر کے تحت رابطہ صرف اسی صورت ممکن ہوگا جب سامنے والے شخص کو صارف کا درست یوزرنیم معلوم ہو۔ واٹس ایپ نے واضح کیا ہے کہ کسی قسم کی عوامی ڈائریکٹری یا یوزرنیم سرچ لسٹ دستیاب نہیں ہوگی اور نہ ہی صارفین کو یوزرنیم کی تجاویز دی جائیں گی، جس سے رازداری میں مزید اضافہ ہوگا۔
چونکہ واٹس ایپ کے دنیا بھر میں 3 ارب سے زائد صارفین موجود ہیں، اس لیے کمپنی نے اعتراف کیا ہے کہ ممکن ہے ہر صارف کو اپنی پسند کا یوزرنیم دستیاب نہ ہو۔
یہ بھی پڑھیے واٹس ایپ پر چیٹس کا رش ختم: اب نظر آئے گا صرف وہی، جو آپ چاہیں گے
واٹس ایپ کے مطابق یوزرنیم ریزرو کرنے کی سہولت آئندہ چند ماہ کے دوران مرحلہ وار دنیا بھر میں متعارف کرائی جائے گی۔ ہر ملک میں فیچر دستیاب ہونے پر صارفین کو ایپ کے ذریعے آگاہ کیا جائے گا۔
کمپنی نے یہ بھی اعلان کیا ہے کہ کانٹینٹ کریئیٹرز، چھوٹے کاروبار اور مختلف تنظیمیں واٹس ایپ پر وہی یوزرنیم محفوظ کر سکیں گی جو وہ پہلے سے میٹا کے دیگر پلیٹ فارمز، یعنی فیس بک یا انسٹاگرام، پر استعمال کر رہے ہیں۔
