پاکستان کے معروف ٹی وی میزبان، اداکار اور ریڈیو براڈکاسٹر توثیق حیدر اور سینئر اداکارہ و میزبان فرح سعدیہ نے سوشل میڈیا پر وائرل ہونے والی اپنی مبینہ شادی کی خبروں کو بے بنیاد قرار دیتے ہوئے ان کی سختی سے تردید کر دی ہے۔
توثیق حیدر نے مزاحیہ انداز میں کہا کہ ہم دونوں یہ خبر آپ کو خود بتانا چاہتے تھے لیکن ہمارے یوٹیوبرر اتنے پروفیشنل ہیں کہ اس سے پہلے ہم یہ خبر بتاتے انہوں نے اس کو وائرل کر دیا۔ انہوں نے ہنستے ہوئے کہا کہ میں آج صبح اٹھا تو مجھے پتہ چلا کہ میری فرح سے شادی ہو چکی ہے۔ اور اس شادی کا مجھے خود بھی نہیں پتہ۔
View this post on Instagram
فرح سعدیہ نے کہا کہ اتنی اچھی اے آئی تصویر بنائی ہوئی تھی توثیق حیدر اس میں بہت اچھے لگ رہے تھے۔ اور اب سلامی بھی بنتی ہے، اگر آپ نے اس ویڈیو سے دو لاکھ کمایا ہے تو ہمیں بھی پچاس پچاس ہزار بھیج دیں۔
ان کا مزید کہنا تھا کہ وہ صرف اچھے دوست ہیں اور اے آئی کے ذریعے ایسی جعلی تصاویر بنانے والوں کو چاہیے کہ وہ اپنا وقت کسی زیادہ مثبت اور تعمیری کام میں صرف کریں۔
یہ بھی پڑھیں: ’فرش پر بیٹھ کر سلامی کے پیسے گن رہی تھی‘، عفت عمر کا شادی کی پہلی رات سے متعلق دلچسپ انکشاف
یاد رہے کہ توثیق حیدر پاکستان کے معروف ٹی وی اور ریڈیو براڈکاسٹرز میں شمار ہوتے ہیں۔ انہوں نے 1987 میں ریڈیو پاکستان سے بطور نیوز کاسٹر اپنے پیشہ ورانہ سفر کا آغاز کیا اور ملک کے پہلے ایف ایم ریڈیو کی ابتدائی آواز بننے کا اعزاز بھی حاصل کیا۔ بعد ازاں انہوں نے ٹی وی میزبانی اور اداکاری کے میدان میں بھی نمایاں کامیابیاں حاصل کیں۔
دوسری جانب فرح سعدیہ پاکستان کی معروف اداکارہ اور میزبان ہیں جنہوں نے ڈرامہ ’بندھن‘ کے ذریعے شہرت حاصل کی۔ اس کے بعد متعدد کامیاب ڈراموں اور طویل عرصے تک مارننگ شوز کی میزبانی کے باعث انہوں نے شوبز انڈسٹری میں اپنی منفرد پہچان قائم کی۔
