اسلام آباد ہائیکورٹ نے موٹرویز پر بغیر ایم ٹیگ یا ناکافی ایم ٹیگ بیلنس رکھنے والی گاڑیوں سے 50 فیصد اضافی ٹول ٹیکس وصول کرنے سے متعلق نیشنل ہائی وے اتھارٹی (این ایچ اے) کا نوٹیفکیشن آئندہ سماعت تک معطل کر دیا ہے۔
یہ بھی پڑھیں: موٹرسائیکلوں پر ایم ٹیگ لگانے کے معاملے میں شہریوں کو ہراساں نہ کیا جائے، اسلام آباد ہائیکورٹ
جسٹس ارباب محمد طاہر نے جمعے کو اس معاملے کی سماعت کے دوران یہ حکم جاری کیا۔ درخواست گزار ایڈووکیٹ جلال حیدر ذاتی حیثیت میں عدالت میں پیش ہوئے۔
عدالت نے این ایچ اے کو موٹر وے استعمال کرنے والے شہریوں سے اضافی ٹول ٹیکس وصول کرنے سے روک دیا اور 30 مئی 2025 کو جاری کیے گئے متعلقہ نوٹیفکیشن کو مزید کارروائی تک معطل کر دیا۔
اسلام آباد ہائیکورٹ نے این ایچ اے، وزارت مواصلات اور دیگر فریقین کو نوٹسز جاری کرتے ہوئے 3 اگست تک جواب جمع کرانے کی ہدایت بھی کی ہے جبکہ آئندہ سماعت بھی اسی تاریخ کو مقرر کی گئی ہے۔
نیشنل ہائی وے اتھارٹی کی جانب سے اضافی ٹول کا معاملہ کیسے کھلا ؟؟؟ یہ وکیل محمد جلال حیدر ہیں جو کچھ عرصہ قبل موٹروے پر جا رہے تھے اضافی ٹول ان سے وصول کیا گیا انہوں نے اس نوٹیفکیشن کی تلاش شروع کی وہ بڑی مشکل ان کو ملا انہوں نے اسلام آباد ہائیکورٹ چیلنج کیا آج ہائیکورٹ نے اس… pic.twitter.com/Yi9VFsKmf5
— Saqib Bashir (@saqibbashir156) July 3, 2026
معطل کیے گئے نوٹیفکیشن کے مطابق موٹرویز پر بغیر ایم ٹیگ یا ناکافی بیلنس کے ساتھ سفر کرنے والے افراد کو معمول کے ٹول ٹیکس کے علاوہ 50 فیصد اضافی سرچارج ادا کرنا پڑتا تھا۔
مزید پڑھیے: اسلام آباد ہائیکورٹ کا طلبا کو ایم ٹیگ کے معاملے میں ریلیف دینے کا حکم
درخواست گزار کے مطابق یہ معاملہ دسمبر 2025 میں اس وقت سامنے آیا جب وہ فیصل آباد جا رہے تھے اور این ایچ اے حکام نے ان سے اضافی چارجز ادا کرنے کا مطالبہ کیا۔ ان کا کہنا تھا کہ اس وقت متعلقہ نوٹیفکیشن فراہم نہیں کیا گیا جسے انہوں نے بعد میں آن لائن حاصل کیا۔
درخواست میں مؤقف اختیار کیا گیا ہے کہ یہ نوٹیفکیشن نیشنل ہائی وے اتھارٹی ایکٹ کی دفعہ 10 کے خلاف ہے کیونکہ قانون این ایچ اے کو صرف ٹول ٹیکس وصول کرنے کا اختیار دیتا ہے، اضافی جرمانے یا سرچارج عائد کرنے کا نہیں۔
درخواست گزار نے مزید مؤقف اپنایا کہ اضافی سرچارج قانونی اختیار کے بغیر نافذ کیا گیا جو این ایچ اے کے قانونی اختیارات سے تجاوز اور آئین کے آرٹیکل 4، 18، 24 اور 25 کی خلاف ورزی ہے۔
مزید پڑھیں: اسلام آباد میں ٹیکسیوں کی رجسٹریشن شروع، ایم ٹیگ سے متعلق موٹرسائیکل سواروں کے لیے خوشخبری
درخواست میں عدالت سے استدعا کی گئی ہے کہ این ایچ اے کو ایم ٹیگ بیلنس سسٹم کا مکمل طریقہ کار عدالت میں پیش کرنے کا حکم دیا جائے جبکہ اضافی وصول کیے گئے تمام چارجز واپس کرنے کی ہدایت بھی جاری کی جائے۔
