لاہور پولیس نے منشیات فروش انمول عرف ’پنکی‘ کے سابق شوہر (ریٹائرڈ پولیس افسر) رانا اکرم کے خلاف گھر میں گھسنے، تشدد کرنے اور چوری کی سنگین دفعات کے تحت مقدمہ درج کرلیا ہے۔
یہ کارروائی شہر کے پولیس چیف کی جانب سے کروائی گئی ایک باقاعدہ انکوائری کے بعد عمل میں آئی ہے، جس میں رانا اکرم کو قصوروار پایا گیا۔
یہ بھی پڑھیں: کراچی: انمول پنکی گینگ کے 2 مبینہ کارندے گرفتار، میتھ اور کوکین برآمد
متاثرہ خاتون یاسمین تبسم کی مدعیت میں درج کروائی گئی ایف آئی آر کے مطابق یہ واقعہ جولائی 2024 میں پیش آیا، جب سابق پولیس افسر رانا اکرم 10 سے زائد پولیس اہلکاروں کے ہمراہ زبردستی اور بغیر کسی اجازت کے ان کے گھر میں داخل ہوئے۔
خاتون نے الزام لگایا ہے کہ رانا اکرم اور ان کے ساتھ آنے والے اہلکاروں نے ان کے شوہر پر شدید تشدد کیا اور گھر میں موجود 55 لاکھ روپے مالیت کے سونے کے زیورات، ملکی و غیر ملکی کرنسی اور دیگر قیمتی سامان لوٹ کر فرار ہوگئے۔
یہ بھی پڑھیں: ’سابق شوہر نے کوکین نیٹ ورک کا حصہ بنایا‘، کوکین کوئین انمول عرف پنکی نے راز کھول دیے
درخواست گزار نے ایف آئی آر میں یہ دعویٰ بھی کیا ہے کہ ملزمان ان کے شوہر کو زبردستی اغوا کر کے اپنے ساتھ لے گئے اور بعد میں انہیں ایک جھوٹے مقدمے میں پھنسایا گیا، جبکہ جاتے ہوئے ملزمان گھر کے باہر کھڑی گاڑی بھی اپنے ساتھ لے اڑے۔
پولیس حکام کا کہنا ہے کہ ملزم رانا اکرم اب پولیس سروس سے ریٹائر ہوچکے ہیں، تاہم قانون کے مطابق کارروائی کو آگے بڑھاتے ہوئے معاملے کی باقاعدہ تفتیش شروع کردی گئی ہے۔
