فیفا ورلڈ کپ 2026 میں انگلینڈ کے ہاتھوں میکسیکو کی شکست کے بعد مشہور اینیمیٹڈ سیریز دی سمپسنز سے منسوب ایک وائرل پیش گوئی غلط ثابت ہوگئی۔
آزتیکا اسٹیڈیم میں کھیلے گئے سنسنی خیز پری کوارٹر فائنل میں انگلینڈ نے میکسیکو کو 2-3 سے شکست دے کر میزبان ٹیم کا سفر ختم کردیا۔ انگلینڈ کی جانب سے کپتان ہیری کین اور جوڈ بیلنگھم نے نمایاں کارکردگی کا مظاہرہ کیا۔
یہ بھی پڑھیں: کیا دی سمپسنز نے ورلڈ کپ 2026 فائنل میں میکسیکو اور پرتگال کے ٹکراؤ کی پیشگوئی کی تھی؟
سوشل میڈیا پر کئی برسوں سے یہ دعویٰ گردش کر رہا تھا کہ دی سمپسنز کی 1997 کی ایک قسط میں بالواسطہ طور پر میکسیکو اور پرتگال کے درمیان ورلڈ کپ فائنل کی پیشگوئی کی گئی تھی۔
دی کارٹریج فیملی نامی اس قسط میں ایک اشتہار میں میکسیکو اور پرتگال کے درمیان فٹبال میچ دکھایا گیا تھا، جسے بعض مداحوں نے 2026 کے ورلڈ کپ فائنل کا اشارہ قرار دیا تھا، حالانکہ اس قسط میں فیفا ورلڈ کپ کا کوئی واضح ذکر موجود نہیں تھا۔
یہ بھی پڑھیں: فیفا ورلڈ کپ میں سیاسی مداخلت کب کب ہوئی؟
میکسیکو کے ٹورنامنٹ سے باہر ہونے کے بعد یہ وائرل نظریہ غلط ثابت ہوگیا، تاہم پرتگال اب بھی ٹائٹل کی دوڑ میں شامل ہے اور اس کا اگلا مقابلہ اسپین سے ہوگا۔
