وزیراعظم محمد شہباز شریف ایک روزہ دورے پر کوئٹہ پہنچ گئے، جہاں وہ بلوچستان میں امن و امان کی مجموعی صورتحال پر اعلیٰ سطحی اجلاس کی صدارت کریں گے۔ دورے کے دوران سکیورٹی، امن و استحکام اور صوبے کی مجموعی صورتحال کا تفصیلی جائزہ لیا جائے گا۔
وزیراعظم محمد شہباز شریف جمعرات کو ایک روزہ دورے پر کوئٹہ پہنچ گئے، جہاں گورنر بلوچستان جعفر خان مندوخیل، وزیراعلیٰ بلوچستان میر سرفراز بگٹی اور اعلیٰ سول و عسکری حکام نے ان کا استقبال کیا۔
وزیراعظم کے ہمراہ وفاقی وزیر اقتصادی امور احد خان چیمہ، وفاقی وزیر اطلاعات و نشریات عطا اللہ تارڑ اور وزیراعظم کے مشیر برائے سیاسی و عوامی امور رانا ثناء اللہ بھی کوئٹہ پہنچے۔
یہ بھی پڑھیں:وزیراعظم شہباز شریف سے کروشیا کے وزیر خارجہ کی ملاقات، تجارت، سرمایہ کاری اور آئی ٹی تعاون بڑھانے پر اتفاق
دورے کے دوران وزیراعظم بلوچستان میں امن و امان کی صورتحال سے متعلق اعلیٰ سطحی اجلاس کی صدارت کریں گے، جس میں صوبے کی مجموعی سکیورٹی صورتحال، امن و استحکام کے لیے جاری اقدامات اور آئندہ کی حکمت عملی کا تفصیلی جائزہ لیا جائے گا۔
اجلاس میں وفاقی اور صوبائی حکام کے علاوہ اعلیٰ سول و عسکری قیادت بھی شریک ہوگی، جبکہ بلوچستان میں امن و امان کو مزید مؤثر بنانے اور سکیورٹی چیلنجز سے نمٹنے کے حوالے سے اہم فیصلوں پر غور کیے جانے کا امکان ہے۔
