عالمی مارکیٹ میں سونے کی قیمت بڑھنے کے اثرات پاکستان کی مقامی صرافہ مارکیٹ پر بھی نمایاں رہے، جہاں ہفتہ کے روز فی تولہ سونے کی قیمت میں 1 ہزار 100 روپے کا اضافہ ریکارڈ کیا گیا، جبکہ چاندی کی فی تولہ قیمت بھی 30 روپے بڑھ کر نئی بلند ترین سطح پر پہنچ گئی۔
مقامی مارکیٹ میں سونا مہنگا
آل پاکستان جیمز اینڈ جیولرز صرافہ ایسوسی ایشن (اے پی جی جے ایس اے) کے مطابق ہفتہ کے روز فی تولہ سونے کی قیمت 1 ہزار 100 روپے اضافے کے بعد 4 لاکھ 33 ہزار 536 روپے ہو گئی۔ اسی طرح 10 گرام سونے کی قیمت 943 روپے بڑھ کر 3 لاکھ 71 ہزار 687 روپے تک پہنچ گئی۔
یہ بھی پڑھیں:سونے کی قیمتوں میں ایک بار پھر اضافہ ریکارڈ،فی تولہ قیمت کتنی ہو گئی؟
عالمی مارکیٹ میں بھی تیزی
بین الاقوامی مارکیٹ میں سونے کی قیمت 11 ڈالر اضافے کے بعد 4 ہزار 111 ڈالر فی اونس ہو گئی، جس میں 20 ڈالر پریمیم بھی شامل ہے۔ عالمی قیمتوں میں اضافے کے باعث مقامی مارکیٹ میں بھی سونے کے نرخ اوپر گئے۔
چاندی نے نئی بلند ترین سطح حاصل کر لی
دوسری جانب چاندی کی قیمت میں بھی نمایاں اضافہ دیکھنے میں آیا۔ فی تولہ چاندی 30 روپے مہنگی ہو کر 6 ہزار 462 روپے کی نئی ریکارڈ سطح پر پہنچ گئی۔
مزید پڑھیں:سونے کی قیمتوں میں معمولی اضافہ، فی تولہ 4 لاکھ 31 ہزار سے تجاوز کر گیا
گزشتہ روز کیا صورتحال تھی؟
یاد رہے کہ جمعہ کے روز فی تولہ سونے کی قیمت 1 ہزار 400 روپے کمی کے بعد 4 لاکھ 32 ہزار 436 روپے پر آ گئی تھی، تاہم ہفتہ کو عالمی مارکیٹ میں بہتری کے بعد مقامی صرافہ بازار میں قیمتوں نے دوبارہ اضافہ ریکارڈ کیا۔
