بھارتی ریلوے کی اے سی کوچز کچھ مسافروں کے لیے سفر کا ذریعہ کم اور ’مفت شاپنگ سینٹر‘ زیادہ بن گئی ہیں۔ صورتحال یہ ہے کہ ٹرینوں میں مسافروں کو فراہم کیے جانے والے تولیے، چادریں، کمبل، تکیوں کے غلاف اور دیگر سامان بڑی تعداد میں غائب ہونے لگا ہے۔
بھارتی میڈیا رپورٹس کے مطابق مالی سال 2024-25 کے دوران اے سی کوچز سے 55 ہزار سے زائد تولیے، 81 ہزار سے زیادہ چادریں، تقریباً 7 ہزار کمبل اور 5 ہزار سے زائد تکیوں کے غلاف غائب ہو گئے۔ ریلوے حکام کا کہنا ہے کہ ان اشیاء کی مسلسل چوری کے باعث ہر سال نئے سامان کی خریداری پر بھاری رقم خرچ کرنا پڑتی ہے۔
یہ بھی پڑھیں: بھارتی ڈرائیور نے سموسوں کے لیے ٹرین روک دی؟ وائرل ویڈیو کی حقیقت نے سب کو چونکا دیا
رپورٹس میں یہ بھی انکشاف کیا گیا ہے کہ گزشتہ 5 برسوں کے دوران بستر اور دیگر سامان کی چوری نے بھارتی ریلوے کو کروڑوں روپے کا نقصان پہنچایا۔ حکام کے مطابق متعدد مسافر سفر کے اختتام پر تولیے، چادریں اور دیگر اشیاء اپنے ساتھ لے جاتے ہیں جس کے نتیجے میں ریلوے کے اخراجات میں مسلسل اضافہ ہو رہا ہے۔
بھارتی ریلوے نے اس مسئلے سے نمٹنے کے لیے نگرانی کے نظام کو مزید مؤثر بنانے، مسافروں میں آگاہی پیدا کرنے اور عملے کو سخت ہدایات جاری کرنے سمیت متعدد اقدامات کیے ہیں تاہم ٹرینوں سے سامان کی چوری کا سلسلہ اب تک مکمل طور پر نہیں روکا جا سکا۔
