وفاقی وزیر بحری امور محمد جنید انوار چوہدری نے کہا ہے کہ حکومت نے پاکستان میرین اکیڈمی کو ڈگری دینے والے ادارے کا درجہ دینے کے لیے اصولی منظوری کی سمری وزیراعظم کو ارسال کر دی ہے۔
مزید پڑھیں:پاکستان کی سمندری خوراک کی برآمدات تاریخ کی بلند ترین سطح پر پہنچ گئیں، جنید انوار چوہدری
اپنے بیان میں انہوں نے کہا کہ تمام متعلقہ اداروں سے مشاورت اور قانونی و انتظامی تقاضے مکمل کیے جا چکے ہیں۔ وزیراعظم کی منظوری کے بعد سمری وزارتِ قانون اور پھر حتمی منظوری کے لیے وفاقی کابینہ کو بھجوائی جائے گی۔
وفاقی وزیر کے مطابق حکومت پاکستان میرین اکیڈمی کو عالمی معیار کے بحری تعلیمی ادارے میں تبدیل کرنا چاہتی ہے اور اس سلسلے میں دنیا کے ممتاز بحری تعلیمی اداروں کے ساتھ ڈوئل ڈگری پروگرام شروع کرنے کے لیے بھی بات چیت جاری ہے۔
انہوں نے کہا کہ اس اقدام سے میری ٹائم تعلیم کا معیار بہتر ہوگا، طلبا کو عالمی سطح پر تسلیم شدہ ڈگریاں اور بہتر روزگار کے مواقع میسر آئیں گے، جبکہ شپنگ، بندرگاہوں اور لاجسٹکس کے شعبوں کے لیے ہنرمند افرادی قوت کی تیاری میں بھی مدد ملے گی۔
مزید پڑھیں:گوادر بندرگاہ پر ایک اور کارگو جہاز کامیابی سے لنگر انداز، ٹرانس شپمنٹ سرگرمیوں میں اضافہ
محمد جنید انوار چوہدری نے کہا کہ یہ اقدام بحری شعبے میں ایک اہم اصلاح ثابت ہوگا اور پاکستان کی بلیو اکانومی کے فروغ اور میری ٹائم شعبے کی پائیدار ترقی میں کلیدی کردار ادا کرے گا۔
