ویسٹ انڈیز کے لیجنڈری کرکٹر اور دنیا کے عظیم ترین آل راؤنڈرز میں شمار ہونے والے سر گارفیلڈ سوبرز 89 برس کی عمر میں انتقال کر گئے۔ کرکٹ ویسٹ انڈیز نے ان کے انتقال کی تصدیق کرتے ہوئے انہیں کھیل کی تاریخ کا غیر معمولی کھلاڑی قرار دیا۔
ویسٹ انڈیز کے عظیم کرکٹر سر گارفیلڈ سوبرز 89 برس کی عمر میں انتقال کر گئے۔ کرکٹ ویسٹ انڈیز نے جمعہ کو ان کے انتقال کی تصدیق کی، تاہم موت کی وجہ نہیں بتائی گئی۔
A great innings has come to an end. In our hearts, now and forever, Sir Garfield Sobers. 🖤🏏 pic.twitter.com/bv2MO1SJgz
— Windies Cricket (@windiescricket) July 17, 2026
کرکٹ ویسٹ انڈیز کے صدر کشور شیلو نے کہا کہ سر گارفیلڈ سوبرز صرف ایک عظیم کرکٹر نہیں بلکہ وہ شخصیت تھے جنہوں نے عظمت کے مفہوم کو نئی تعریف دی۔ ان کے مطابق سوبرز کی بیٹنگ، باؤلنگ اور فیلڈنگ میں مہارت بے مثال تھی اور انہوں نے کیریبین کرکٹ کو عالمی سطح پر منفرد شناخت دی۔
28 جولائی 1936 کو بارباڈوس کے شہر برج ٹاؤن میں پیدا ہونے والے سوبرز نے صرف 17 سال کی عمر میں ٹیسٹ کرکٹ میں قدم رکھا۔ انہوں نے 1954 سے 1974 تک ویسٹ انڈیز کی نمائندگی کرتے ہوئے 93 ٹیسٹ میچز میں 8 ہزار 32 رنز، 235 وکٹیں اور 109 کیچز حاصل کیے، جبکہ ان کا بیٹنگ اوسط 57.78 رہا۔ انہوں نے 26 ٹیسٹ سنچریاں بھی اسکور کیں اور 39 ٹیسٹ میچز میں ویسٹ انڈیز کی قیادت کی۔
یہ بھی پڑھیں:افغان کرکٹر شاپور زدران کا انتقال، شاہد آفریدی کا خراج عقیدت
1958 میں پاکستان کے خلاف ناٹ آؤٹ 365 رنز کی تاریخی اننگز نے انہیں عالمی شہرت دلائی۔ یہ اس وقت ٹیسٹ کرکٹ کا عالمی ریکارڈ تھا جو 36 برس تک برقرار رہا، بعد ازاں برائن لارا نے اسے توڑا۔ سوبرز ٹیسٹ کرکٹ میں 8 ہزار رنز مکمل کرنے والے پہلے کھلاڑی بھی تھے، جبکہ 1968 میں انگلش کاؤنٹی کرکٹ میں ایک اوور میں مسلسل 6 چھکے لگانے والے دنیا کے پہلے فرسٹ کلاس کرکٹر بھی بنے۔
سر گارفیلڈ سوبرز کو 1975 میں ملکہ الزبتھ دوم نے کرکٹ میں شاندار خدمات کے اعتراف میں نائٹ کا خطاب دیا، جبکہ 2009 میں انہیں آئی سی سی ہال آف فیم میں بھی شامل کیا گیا۔ آسٹریلیا کے عظیم بلے باز سر ڈان بریڈمین نے انہیں ’ہر دور کا بہترین کرکٹر‘ قرار دیا تھا۔
A legendary career that shaped the game ⭐
Sir Garfield Sobers leaves behind a legacy that will endure for generations 👏 pic.twitter.com/mo9GyIsuhb
— ICC (@ICC) July 17, 2026
سر گارفیلڈ سوبرز کے انتقال پر انگلینڈ اینڈ ویلز کرکٹ بورڈ، بھارتی کرکٹ بورڈ اور دنیا بھر کی کرکٹ شخصیات نے گہرے رنج و غم کا اظہار کرتے ہوئے انہیں کھیل کی تاریخ کا ناقابلِ فراموش باب قرار دیا۔ ان کے انتقال سے عالمی کرکٹ ایک ایسی ہمہ جہت شخصیت سے محروم ہو گئی ہے جس کی خدمات ہمیشہ یاد رکھی جائیں گی۔
