خاتون نے رضامندی کے بغیر مجھے بوسہ دیا’، پولیس اہلکار نے ہراسانی کا مقدمہ درج کروا دیا

بھارت کی نیشنل پولیس اکیڈمی کے ایک آئی پی ایس افسر ادے کرشنا ریڈی کو مبینہ طور پر خودکشی کی کوشش کے بعد اسپتال منتقل کر دیا گیا جبکہ ان کے خلاف ایک خاتون آئی پی ایس کی جانب سے ہراسانی تعاقب، جسمانی تشدد اور خفیہ طور پر نجی ویڈیو ریکارڈ کرنے کے الزامات پر مقدمہ درج کیا جا چکا ہے۔ تاہم کرشنا ریڈی کا کہنا ہے کہ خاتون نے ان کی رضامندی کے بغیر انہیں بوسہ دیا اور گلے لگایا اور انہوں نے بطور ثبوت ویڈیو محفوظ کی۔

پولیس کے مطابق کرشنا ریڈی ایک دوست کے گھر گئے جہاں مبینہ طور پر انہوں نے زہریلی دوا پی لی تاہم حکام نے تاحال باضابطہ طور پر خودکشی کی کوشش کی تصدیق نہیں کی۔ ریڈی اس وقت اسپتال میں زیرِ علاج ہیں۔

یہ بھی پڑھیں: ’وہ کسی اور کا ہوگا تو قیامت ہوگی‘، گرل فرینڈ کی شادی کسی اور سے طے پانے پر باڈی بلڈر عاشق نے خود کشی کرلی

چند روز قبل 30 سالہ خاتون آئی پی ایس پروبیشنر نے حیدرآباد پولیس کو دی گئی شکایت میں الزام عائد کیا تھا کہ جون کے دوران مختلف مواقع پر ریڈی نے ان کا تعاقب کیا، انہیں جسمانی تشدد کا نشانہ بنایا، دھمکیاں دیں اور ان کی اجازت کے بغیر نجی ویڈیو ریکارڈ کی۔

شکایت کے مطابق ملزم نے واٹس ایپ پر نازیبا اور جنسی نوعیت کے پیغامات بھیجے، دیگر پروبیشنرز کے سامنے خاتون کے بارے میں توہین آمیز تبصرے کیے اور انہیں ایک دوسرے ٹرینی کے ساتھ تعلقات کا اعتراف کرنے کے لیے دباؤ میں رکھا۔

یہ بھی پڑھیں: بھارت: بیٹی کو قتل کرکے خود کشی کا رنگ دینے والا باپ گرفتار

خاتون نے مزید الزام لگایا کہ ریڈی نے زبردستی ان کا موبائل فون حاصل کیا، نجی چیٹس دیکھیں، فون اپنے کمرے میں لے گئے اور پاس ورڈ بھی معلوم کیا۔ انہوں نے یہ بھی دعویٰ کیا کہ ایک موقع پر ملزم نے انہیں اپنے کمرے میں زبردستی روک کر تشدد کیا، بال کھینچے، گلا دبانے کی کوشش کی، گردن پر چاقو رکھا اور باہر جانے سے روکے رکھا۔ شکایت میں یہ بھی کہا گیا ہے کہ 10 جولائی کو ملزم نے انہیں نامناسب انداز میں چھونے کی کوشش کی۔

خاتون کے مطابق سب سے سنگین واقعہ ان کی اجازت کے بغیر نجی ویڈیو ریکارڈ کرنا تھا جسے بعد ازاں مبینہ طور پر انہیں بلیک میل کرنے کی غرض سے ان کے شوہر کو بھیج دیا گیا۔ انہوں نے یہ بھی الزام لگایا کہ ملزم نے ان کی ساکھ کو نقصان پہنچانے کے لیے جھوٹی اور توہین آمیز معلومات پھیلائیں۔

یہ بھی پڑھیں: اطالوی بچی کی خودکشی کے بعد میٹا اور ٹک ٹاک کیخلاف مقدمہ

خاتون کی شکایت پر حیدرآباد پولیس نے بھارتیہ نیایا سنہیتا (BNS) کی مختلف دفعات اور انفارمیشن ٹیکنالوجی ایکٹ کے تحت مقدمہ درج کر لیا ہے۔

دوسری جانب مبینہ خودکشی کی کوشش سے قبل لکھے گئے دو صفحات پر مشتمل نوٹ میں ادے کرشنا ریڈی نے تمام الزامات مسترد کرتے ہوئے دعویٰ کیا کہ ان کے اور خاتون کے درمیان جون 2025 سے باہمی رضامندی پر مبنی رومانوی تعلق تھا جو خاتون کی شادی کے بعد بھی جاری رہا۔

ریڈی نے الزام لگایا کہ خاتون اپنی مرضی سے ان کے کمرے میں آتی تھیں اور متعدد مواقع پر خود رابطہ کرتی تھیں۔ ان کا کہنا تھا کہ انہوں نے صرف اپنے دفاع کے لیے ویڈیو ریکارڈ کی کیونکہ انہیں خدشہ تھا کہ ان پر جھوٹے الزامات لگائے جا سکتے ہیں۔

یہ بھی پڑھیں: کوئٹہ میں اندوہناک واقعہ، مالی مشکلات کے شکار شخص نے اہلیہ اور 4 بچوں کو قتل کر کے خودکشی کر لی

انہوں نے مزید دعویٰ کیا کہ ایک موقع پر خاتون نے ان کی رضامندی کے بغیر انہیں بوسہ دیا اور گلے لگایا جس کے بعد انہوں نے بطور ثبوت ویڈیو محفوظ کی اور بعد میں خاتون کے شوہر کو بھیج دی۔ ریڈی کے مطابق خاتون نے بعد میں تمام حقائق کو مسخ کرتے ہوئے ان پر جھوٹے الزامات عائد کیے۔

پولیس کا کہنا ہے کہ دونوں فریقین کے دعوؤں اور الزامات کی تحقیقات جاری ہیں اور شواہد کی بنیاد پر مزید قانونی کارروائی عمل میں لائی جائے گی۔ نیشنل پولیس اکیڈمی کے حکام نے بھی اسپتال پہنچ کر ریڈی کی طبی حالت کے بارے میں معلومات حاصل کی ہیں۔