بھارتی گلوکار اریجیت سنگھ کی پلے بیک سنگنگ میں واپسی کی خبریں سوشل میڈیا پر گردش کر رہی ہیں۔ رپورٹس کے مطابق اریجیت فلم ’آوارہ پن 2‘ کے گانے سے دوبارہ فلمی گائیکی کا آغاز کرنے والے تھے تاہم ان کے منیجر نے ان خبروں کی تردید کر دی۔
بھارتی میڈیا رپورٹس میں دعویٰ کیا گیا تھا کہ اریجیت سنگھ فلم ’آوارہ پن 2‘ کے پہلے گانے ’یہ آوارہ پن‘ کے ذریعے فلمی گائیکی میں واپسی کر رہے ہیں۔ رپورٹ کے مطابق اس گانے کی موسیقی امال ملک نے ترتیب دی ہے جبکہ بول راشمی وراگ نے لکھے ہیں، اور یہ 21 جولائی کو مختلف اسٹریمنگ پلیٹ فارمز پر جاری کیا جائے گا۔
یہ بھی پڑھیں: بھارتی گلوکار اریجیت سنگھ کی عاطف اسلم اور شفقت امانت کی کھل کر تعریف
رپورٹس کے مطابق فلم کے پروڈیوسر وشیش بھٹ چاہتے تھے کہ یہ گانا عمران ہاشمی کے کردار شیوم پانڈت کے جذباتی سفر کی بھرپور عکاسی کرے جس کے لیے انہوں نے اریجیت سنگھ کی آواز کو موزوں قرار دیا۔
تاہم یہ خبر وائرل ہونے کے بعد اریجیت سنگھ کے منیجر نے واضح کیا کہ گلوکار پلے بیک سنگنگ میں واپسی نہیں کر رہے، یوں کم بیک سے متعلق گردش کرنے والی خبروں کی تردید کر دی گئی۔
یہ بھی پڑھیں: ریٹائرمنٹ کے صرف چند دن بعد اریجیت سنگھ کی واپسی، مداح حیران
واضح رہے کہ اریجیت سنگھ اور وشیش فلمز ماضی میں کئی کامیاب گانوں پر ایک ساتھ کام کر چکے ہیں، جن میں ’پھر محبت‘، ’تم ہی ہو‘، ’مسکرانے‘، ’خاموشیاں‘، ’ہماری ادھوری کہانی‘ اور ’پل‘ شامل ہیں۔
دوسری جانب فلم ’آوارہ پن 2‘ میں عمران ہاشمی مرکزی کردار ادا کر رہے ہیں جبکہ ان کے ساتھ دیشا پٹانی، شبانہ اعظمی، سریندر وکی، وجینت کوہلی اور اتل کمار بھی اہم کرداروں میں نظر آئیں گے۔ فلم کی ہدایت کاری نتن ککڑ نے کی ہے جبکہ اسے وشیش بھٹ نے پروڈیوس کیا ہے۔ فلم 14 اگست کو سینما گھروں میں نمائش کے لیے پیش کی جائے گی۔
یہ بھی پڑھیں: معروف بھارتی گلوکار اریجیت سنگھ کا پلے بیک سنگنگ سے ریٹائرمنٹ کا اعلان
یاد رہے کہ اریجیت سنگھ نے رواں سال جنوری میں انسٹاگرام پر ایک پیغام کے ذریعے اعلان کیا تھا کہ وہ پلے بیک سنگر کے طور پر نئے منصوبے قبول نہیں کریں گے۔ جس کے بعد ان کی ممکنہ واپسی سے متعلق خبریں سوشل میڈیا پر خاصی توجہ کا مرکز بنی رہیں۔
