جہاں فیفا ورلڈ کپ 2026 کی کوریج کے لیے دنیا بھر کے فوٹوگرافر جدید ترین ڈیجیٹل کیمروں سے لیس تھے، وہیں مصری فوٹو جرنلسٹ فرید قطب ایک 96 سال پرانے تاریخی کیمرے کے ساتھ منفرد انداز میں ٹورنامنٹ کی تصویری کوریج کر کے شائقین، میڈیا نمائندوں اور آفیشلز کی توجہ کا مرکز بن گئے۔
فرید قطب نے اپنے اس منفرد منصوبے کو پروجیکٹ 1930 کا نام دیا۔ انہوں نے فیفا ورلڈ کپ 2026 کے منتخب میچوں کی کوریج Zeiss Ikon Ideal 250-11 فولڈنگ کیمرے سے کی، جو 1930 میں کھیلے گئے پہلے فیفا ورلڈ کپ کے دوران بھی استعمال کیا گیا تھا۔ اسی تاریخی ٹورنامنٹ میں یوراگوئے نے عالمی چیمپئن کا اعزاز حاصل کیا تھا۔
یہ بھی پڑھیے فیفا ورلڈ کپ کی تاریخ میں نیا حیران کن منفرد ریکارڈ کیا ہے؟
فرید قطب کا کہنا ہے کہ ان کا مقصد صرف ایک پرانا کیمرہ استعمال کرنا نہیں تھا بلکہ وہ ماضی اور حال کے درمیان ایک منفرد ربط قائم کرنا چاہتے تھے، تاکہ 1930 کے پہلے ورلڈ کپ اور 2026 کے جدید ترین عالمی مقابلوں کو ایک ہی کیمرے کے ذریعے جوڑا جا سکے۔
انہوں نے بتایا کہ وہ 2019 سے افریقی فٹبال مقابلوں کی کوریج کر رہے ہیں۔ اس سے قبل وہ روس میں 2018 کا فیفا ورلڈ کپ، قطر میں 2022 کا ورلڈ کپ اور اولمپک گیمز بھی کور کر چکے ہیں، تاہم تیسرے ورلڈ کپ کے لیے وہ کچھ بالکل مختلف کرنا چاہتے تھے۔
اس منفرد خیال کو عملی شکل دینے کے لیے انہوں نے تقریباً ایک سال تک 1930 میں استعمال ہونے والے اصل ماڈل کا کیمرہ تلاش کیا۔ بالآخر مطلوبہ کیمرہ مل گیا، جس کے بعد انہوں نے نہ صرف اسے استعمال کرنا سیکھا بلکہ اس میں تکنیکی تبدیلیاں بھی کیں۔
اصل میں یہ کیمرہ شیشے کی پلیٹوں پر تصاویر محفوظ کرتا تھا، لیکن فرید قطب نے اسے اس انداز میں تبدیل کیا کہ وہ جدید نیگیٹو فلم استعمال کر سکے، جس کے بعد وہ اس تاریخی کیمرے کو عملی طور پر دوبارہ قابلِ استعمال بنانے میں کامیاب ہو گئے۔
انہوں نے سب سے پہلے اس بحال شدہ کیمرے سے کینیڈا میں پرتگال اور کروشیا کے درمیان میچ کی تصاویر بنائیں، جبکہ بعد ازاں کولمبیا اور سوئٹزرلینڈ کے مقابلے کی کوریج بھی اسی کیمرے سے کی۔
میچوں کے دوران جب فرید قطب روایتی انداز میں سیاہ فوکسنگ کپڑے کے نیچے جھک کر اس بڑے فولڈنگ کیمرے سے تصاویر بناتے تو شائقین، آفیشلز اور دیگر فوٹوگرافر حیرت سے ان کے گرد جمع ہو جاتے۔ جدید ڈیجیٹل آلات کے درمیان تقریباً ایک صدی پرانا کیمرہ سب کے لیے غیرمعمولی دلچسپی کا باعث بن گیا۔
فرید قطب کا کہنا ہے کہ اس منصوبے کے دوران انہیں اس تاریخی کیمرے سے ایک خاص جذباتی وابستگی ہو گئی ہے۔
یہ بھی پڑھیے فیفا ورلڈ کپ: میچ ڈرا کے بعد جاپانی شائقین کا نظم و ضبط سے بھرپور جشن، ویڈیو وائرل
انہوں نے کہا، ’مجھے محسوس ہوتا ہے کہ یہ کیمرہ اب میری زندگی کا حصہ بن چکا ہے اور ہمارے درمیان ایک خاص ہم آہنگی پیدا ہو گئی ہے۔‘
انہوں نے مزید بتایا، ’جب میں اس کیمرے کو اپنے ساتھ سفر پر لے جاتا ہوں تو ایسا لگتا ہے جیسے اپنے چھوٹے بیٹے کو دنیا دکھانے کے لیے باہر لے جا رہا ہوں۔ یہ کیمرہ کئی دہائیوں تک خاموش رہا، لیکن اب دوبارہ زندگی پا چکا ہے۔‘
فرید قطب کے مطابق اس تاریخی کیمرے کے ساتھ کام کرتے ہوئے انہیں ایسا محسوس ہوتا ہے جیسے وہ جدید کھیلوں کی دنیا سے نکل کر تقریباً ایک صدی پرانے دور میں پہنچ گئے ہوں۔
ان کا کہنا تھا، ’میچ کے دوران جب میں اس کیمرے کو دیکھتا ہوں تو بے حد خوشی محسوس ہوتی ہے۔ ایسا لگتا ہے جیسے میں کسی دوسرے زمانے سے آیا ہوں، اور یہ کیمرہ جدید ٹیکنالوجی کے اس ہجوم میں حیرت سے اپنے اردگرد کا منظر دیکھ رہا ہو۔‘
