پاکستان میں مہنگائی کی سالانہ شرح جولائی 2026 کے دوران کم ہو کر 9.2 فیصد ریکارڈ کی گئی، جو جون کے 11.1 فیصد کے مقابلے میں نمایاں کمی ہے، تاہم گزشتہ سال جولائی 2025 میں یہ شرح 4.1 فیصد تھی۔
ادارہ شماریات کی جانب سے پیر کو جاری کردہ اعدادوشمار کے مطابق ماہانہ بنیاد پر صارف قیمت اشاریہ (سی پی آئی) میں 1.2 فیصد اضافہ ہوا۔
جبکہ جون میں مہنگائی میں 0.3 فیصد کمی ریکارڈ کی گئی تھی۔ جولائی 2025 میں ماہانہ بنیاد پر مہنگائی میں 2.9 فیصد اضافہ ہوا تھا۔
یہ بھی پڑھیں: مہنگائی کی شرح میں مسلسل دوسرے ہفتے اضافہ، ادارہ شماریات
اعدادوشمار کے مطابق شہری علاقوں میں سالانہ افراطِ زر جولائی میں 8.7 فیصد رہی، جو جون میں 11.2 فیصد تھی، جبکہ جولائی 2025 میں یہ شرح 4.4 فیصد ریکارڈ کی گئی تھی۔
شہری علاقوں میں ماہانہ بنیاد پر بھی مہنگائی میں 1.2 فیصد اضافہ ہوا، جبکہ گزشتہ ماہ 0.5 فیصد کمی دیکھی گئی تھی۔
Analysts expect Pakistan’s CPI to ease to 9.1%–9.3% in July, dropping below 10% for the first time since April. But core (NFNE) inflation likely remains resilient, driven by base effects and volatile food and fuel.
Read more at:https://t.co/Ha3Rv0Izk2 pic.twitter.com/qKVJzt3hfO— Profit (@Profitpk) July 27, 2026
دیہی علاقوں میں سالانہ افراطِ زر 9.9 فیصد ریکارڈ کی گئی، جو جون میں 10.9 فیصد تھی، جبکہ ایک سال قبل جولائی 2025 میں یہ شرح 3.5 فیصد تھی۔
ماہانہ بنیاد پر دیہی علاقوں میں بھی قیمتوں میں 1.2 فیصد اضافہ ہوا، جبکہ جون میں قیمتیں مجموعی طور پر مستحکم رہی تھیں۔
حکومتی توقعات
وزارتِ خزانہ نے اپنے تازہ ماہانہ اقتصادی جائزے میں جولائی کے دوران مہنگائی کی شرح 9 سے 10 فیصد رہنے کا امکان ظاہر کیا تھا۔
وزارت کے مطابق عالمی منڈی میں تیل کی قیمتوں میں اضافے کے ساتھ ساتھ براہِ راست غیر ملکی سرمایہ کاری میں 33.9 فیصد کمی بھی معیشت کے لیے تشویش کا باعث ہے۔
گزشتہ مالی سال کے دوران ایف ڈی آئی 2.48 ارب ڈالر سے کم ہو کر 1.64 ارب ڈالر رہ گئی۔
مزید پڑھیں: سال 2025 کے دوران ملک بھر میں مہنگائی بڑھی یا کم ہوئی؟
دوسری جانب اسٹیٹ بینک آف پاکستان کی مانیٹری پالیسی کمیٹی نے مالی سال 27-2026 کے پہلے اجلاس میں پالیسی ریٹ 11.5 فیصد پر برقرار رکھا تھا۔
اس موقع پر گورنر اسٹیٹ بینک جمیل احمد نے توقع ظاہر کی تھی کہ جولائی میں مہنگائی میں کمی آئے گی۔
ان کا کہنا تھا کہ مالی سال کے اختتام تک صارف قیمت اشاریہ اسٹیٹ بینک کے 5 سے 7 فیصد کے ہدف کی بالائی حد تک پہنچنے کی توقع ہے۔
ماہرین کی رائے
معاشی ماہرین نے بھی جولائی میں مہنگائی کی شرح کے دوبارہ سنگل ڈیجٹ میں آنے کی پیش گوئی کی تھی، تاہم ان کا کہنا تھا کہ اس کی بڑی وجہ گزشتہ سال کے بلند تقابلی اعدادوشمار ہیں، جبکہ بنیادی سطح پر قیمتوں پر دباؤ اب بھی برقرار ہے۔
ماہرین نے جولائی میں سالانہ مہنگائی 9.3 فیصد رہنے کا تخمینہ لگاتے ہوئے کہا تھا کہ سنگل ڈیجٹ میں واپسی حقیقی طور پر قیمتوں میں کمی کے بجائے زیادہ تر بیس ایفیکٹ کا نتیجہ ہے۔
ادھر جے ایس گلوبل نے جولائی کے لیے سالانہ مہنگائی کی شرح 9.1 فیصد رہنے کی پیش گوئی کی تھی، جبکہ سرکاری اعدادوشمار کے مطابق یہ شرح 9.2 فیصد ریکارڈ کی گئی۔
