وزیراعظم محمد شہباز شریف سے جاپان انٹرنیشنل کوآپریشن ایجنسی (جائیکا) کے صدر ڈاکٹر تناکا اکیہیکو کی قیادت میں 9 رکنی وفد نے ملاقات کی، جس میں پاکستان اور جاپان کے درمیان دیرینہ شراکت داری، معاشی اصلاحات اور مختلف ترقیاتی شعبوں میں تعاون کے فروغ پر تبادلہ خیال کیا گیا۔
وزیراعظم نے وفد سے گفتگو کرتے ہوئے کہا کہ پاکستان جاپان اور جائیکا کے ساتھ اپنی دہائیوں پر محیط تاریخی شراکت داری کو انتہائی اہمیت دیتا ہے۔ انہوں نے امید ظاہر کی کہ جائیکا کے صدر کا دورہ دونوں ممالک کے درمیان تعلقات کو مزید مضبوط بنانے میں معاون ثابت ہوگا۔
شہباز شریف نے کہا کہ حکومت نے اجتماعی کوششوں سے مشکل معاشی چیلنجز پر قابو پایا اور اب پائیدار اقتصادی ترقی کے لیے اصلاحات کا عمل تیزی سے جاری ہے۔ ان کا کہنا تھا کہ حکومتی اصلاحات کے نتیجے میں صرف تین برس کے دوران سرکاری محصولات میں دوگنا اضافہ ہوا ہے۔
A delegation led by President of Japan International Cooperation Agency (JICA) Dr. Tanaka Akihiko called on Prime Minister Muhammad Shehbaz Sharif in Islamabad on 5 August 2026. pic.twitter.com/aiNQ8KvPR5
— Prime Minister's Office (@PakPMO) August 5, 2026
وزیراعظم نے کہا کہ نوجوانوں کو ہنر، تکنیکی تربیت اور باعزت روزگار کی فراہمی، خواتین کو بااختیار بنانا اور معدنیات کے شعبے کی ترقی حکومت کی اولین ترجیحات میں شامل ہیں۔ انہوں نے معدنیات کے شعبے میں جائیکا کے تکنیکی تعاون کا خیرمقدم کرتے ہوئے کہا کہ چھوٹے اور درمیانے درجے کے کاروبار (ایس ایم ایز) کے فروغ کے لیے اسمال اینڈ میڈیم انٹرپرائزز ڈویلپمنٹ اتھارٹی (سمیڈا) میں اصلاحات کی گئی ہیں اور اس شعبے میں جائیکا کا تعاون برآمدات بڑھانے میں مددگار ثابت ہوگا۔
اس موقع پر وزیراعظم نے حالیہ زلزلے میں قیمتی انسانی جانوں کے ضیاع پر جائیکا کے صدر سے تعزیت کا اظہار کیا، جس پر ڈاکٹر تناکا اکیہیکو نے شکریہ ادا کیا۔
یہ بھی پڑھیں:غزہ امن منصوبے پر پیشرفت کا خیرمقدم، فلسطینی ریاست کے قیام کی امید ہے، وزیراعظم شہباز شریف
جائیکا کے صدر نے پاکستان میں پرتپاک میزبانی پر اظہارِ تشکر کرتے ہوئے کہا کہ جائیکا اور پاکستان کے درمیان تعاون کی ایک طویل تاریخ ہے اور ادارہ صحت، تعلیم، شہری و دیہی ترقی، فنی و پیشہ ورانہ تربیت اور صنعتی ترقی سمیت مختلف شعبوں میں تعاون کو مزید وسعت دینے کے لیے تیار ہے۔ انہوں نے کہا کہ وفاقی اور صوبائی حکومتوں کی ترقیاتی ترجیحات کے مطابق تعاون کو مزید مضبوط بنایا جائے گا۔
ڈاکٹر تناکا اکیہیکو نے مشرقِ وسطیٰ میں قیامِ امن کے لیے پاکستان اور اس کی قیادت کی کوششوں کو بھی سراہتے ہوئے کہا کہ جاپان سمیت عالمی برادری ان اقدامات کو قدر کی نگاہ سے دیکھتی ہے۔
ملاقات میں وفاقی وزرا احسن اقبال، احد خان چیمہ، ڈاکٹر مصدق مسعود ملک، حنیف عباسی، سردار اویس احمد خان لغاری، شزا فاطمہ خواجہ، وزیراعظم کے معاونینِ خصوصی سید طارق فاطمی اور ہارون اختر سمیت متعلقہ اداروں کے اعلیٰ حکام بھی شریک تھے۔
