پنجاب کے ضلع سرگودھا کی تحصیل بھلوال میں کام سے چھٹی کرنے پر ایک ملازم کی زبان قینچی سے کاٹنے کا مبینہ واقعہ پیش آیا ہے، جس کے بعد پولیس نے مقدمے کے اندراج کے لیے کارروائی اور واقعے کی تحقیقات شروع کر دی ہیں۔
میڈیا رپورٹس کے مطابق زخمی شخص کو فوری طور پر اسپتال منتقل کر دیا گیا، جہاں اسے طبی امداد فراہم کی جا رہی ہے۔
یہ بھی پڑھیں:’پنجاب پولیس پاکستان ایپ‘ گمشدہ دستاویزات کی رپورٹ اب گھر بیٹھے ممکن
پولیس کا کہنا ہے کہ متاثرہ شہری کی اہلیہ کی درخواست موصول ہوئی ہے، جس میں 4 افراد کو نامزد کیا گیا ہے۔ درخواست کے مطابق متاثرہ شخص بیماری کے باعث کام پر نہیں جا سکا، جس پر مبینہ طور پر ایک ملزم گھر میں داخل ہوا، اسے تشدد کا نشانہ بنایا اور بعد ازاں قینچی سے اس کی زبان کاٹ دی۔
پولیس کے مطابق واقعے کے مختلف پہلوؤں سے تحقیقات کی جا رہی ہیں اور شواہد کی روشنی میں قانونی کارروائی عمل میں لائی جائے گی۔ حکام کا کہنا ہے کہ تحقیقات مکمل ہونے کے بعد ہی واقعے کی اصل نوعیت اور ذمہ داران کا تعین کیا جا سکے گا۔
