راولپنڈی کے الخدمت رازی اسپتال نے شعبۂ یورولوجی میں ایک اہم کامیابی حاصل کرتے ہوئے صرف 18 ماہ کے دوران گردے کی پتھری کے ایک ہزار مسلسل پی سی این ایل (PCNL) آپریشن کامیابی سے مکمل کر لیے ہیں۔
اسپتال کی جانب سے جاری اعلامیے کے مطابق یہ کامیابی ادارے کے لیے ایک اہم سنگِ میل ہے، جہاں جدید طبی سہولتوں اور ماہر ڈاکٹروں کی خدمات کی بدولت مریضوں کو معیاری علاج فراہم کیا جا رہا ہے۔
یہ بھی پڑھیں:کراچی میں جدید طبی سہولیات کا اضافہ، الخدمت ڈائیگناسٹکس میں جدید سالماتی تشخیصی سروسز کا آغاز
اعلامیے میں بتایا گیا کہ ایک ہزار آپریشنز میں 99 فیصد سے زائد مریضوں کا علاج بغیر کسی بڑی پیچیدگی کے کامیابی سے مکمل ہوا، جبکہ بڑے طبی مسائل کی شرح ایک فیصد سے بھی کم رہی۔ خون کی منتقلی کی ضرورت صرف 2 فیصد مریضوں کو پیش آئی، بیشتر مریض 24 گھنٹوں سے بھی کم وقت میں اسپتال سے گھر چلے گئے، جبکہ دوبارہ پی سی این ایل یا ای ایس ڈبلیو ایل (ESWL) کی ضرورت صرف 6 فیصد مریضوں کو پڑی۔
اسپتال کے مطابق 3 سال سے 80 سال تک کی عمر کے مریضوں کا کامیاب علاج کیا گیا، جو شعبۂ یورولوجی کی مہارت اور تجربے کا واضح ثبوت ہے۔
الخدمت رازی اسپتال نے اس کامیابی کا سہرا شعبۂ یورولوجی کے ماہر ڈاکٹروں ڈاکٹر نوید احمد، ڈاکٹر حمزہ شیرازی، ڈاکٹر منیب احمد اور پوری یورولوجی ٹیم کے سر باندھا۔ اعلامیے میں کہا گیا کہ ماہر ڈاکٹروں، تجربہ کار طبی عملے اور جدید طریقۂ علاج کی بدولت مریضوں کو محفوظ اور مؤثر طبی سہولتیں فراہم کی جا رہی ہیں۔
اسپتال انتظامیہ نے اس عزم کا اظہار کیا کہ آئندہ بھی جدید طبی خدمات اور اعلیٰ معیار کے علاج کے ذریعے مریضوں کی بہترین دیکھ بھال کا سلسلہ جاری رکھا جائے گا۔
