وفاقی جمہوریہ صومالیہ کے وزیر دفاع، سفیر احمد معلم فقی کی قیادت میں اعلیٰ سطح کے وفد نے جنرل ہیڈکوارٹرز (جی ایچ کیو) راولپنڈی میں چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر سے ملاقات کی۔
یہ بھی پڑھیں: فیلڈ مارشل عاصم منیر کا این ڈی ایم اے ہیڈکوارٹرز کا دورہ، مون سون سے نمٹنے کی تیاریوں کا جائزہ
پاک فوج کے شعبہ تعلقات عامہ (آئی ایس پی آر) کے مطابق ملاقات میں باہمی دلچسپی کے امور، خطے کی سکیورٹی صورتحال اور پاکستان و صومالیہ کے درمیان دفاعی و سکیورٹی تعاون کو مزید فروغ دینے کے اقدامات پر تفصیلی تبادلہ خیال کیا گیا۔
دونوں فریقوں نے مشترکہ سکیورٹی چیلنجز سے نمٹنے کے لیے فوجی روابط، عسکری تعاون اور استعدادِ کار بڑھانے کے منصوبوں کو مزید وسعت دینے کی ضرورت پر اتفاق کیا اور دفاعی شعبے میں قریبی تعاون جاری رکھنے کے عزم کا اظہار کیا۔
اس موقعے پر صومالیہ کے وزیر دفاع نے خطے میں امن و استحکام کے فروغ کے لیے پاکستان کی مستقل حمایت اور پاکستان کی مسلح افواج کے پیشہ ورانہ کردار کو سراہتے ہوئے اس کی تعریف کی۔
فیلڈ مارشل سید عاصم منیر نے اس موقع پر اس عزم کا اعادہ کیا کہ پاکستان صومالیہ کی سیکیورٹی صلاحیتوں کو مزید مضبوط بنانے، اس کے دفاعی اداروں کی استعداد بڑھانے اور خطے میں پائیدار امن و استحکام کے فروغ کے لیے ہر ممکن تعاون جاری رکھے گا۔
