وزیراعلیٰ پنجاب مریم نواز شریف کی زیر صدارت پنجاب ڈویلپمنٹ پروگرام (پی ڈی پی) کے حوالے سے خصوصی جائزہ اجلاس منعقد ہوا، جس میں جاری ترقیاتی منصوبوں پر پیش رفت کا تفصیلی جائزہ لیا گیا۔
وزیراعلیٰ مریم نواز شریف نے حکام کو پنجاب ڈویلپمنٹ پروگرام کے پہلے مرحلے کو جلد از جلد مکمل کرنے کی ہدایت کرتے ہوئے کہا کہ ترقیاتی منصوبوں کی بروقت تکمیل کو ہر صورت یقینی بنایا جائے۔
یہ بھی پڑھیں:نواز شریف سے گزارش ہے کہ مریم نواز کو کراچی بھیج دیں، شاید وہ شہر کو ٹھیک کردیں، وسیم اختر
انہوں نے ہدایت کی کہ مون سون سیزن کے اختتام کے فوراً بعد پنجاب کے ہر شہر میں خستہ حال اور بوسیدہ عمارتوں کا جامع سروے کیا جائے تاکہ عوام کی جان و مال کے تحفظ کے لیے بروقت اقدامات کیے جا سکیں۔
اجلاس میں وزیراعلیٰ نے سیوریج اور ڈرینیج منصوبوں کے اثرات کا تفصیلی جائزہ لینے کی بھی ہدایت کی اور کہا کہ ان منصوبوں کی افادیت کا باقاعدہ مطالعہ کیا جائے۔
مریم نواز شریف نے پنجاب ڈویلپمنٹ پروگرام سے متعلق عوامی رائے اور فیڈبیک حاصل کرنے کی بھی ہدایت دیتے ہوئے کہا کہ ترقیاتی منصوبوں کی کامیابی کا اصل معیار عوام کو درپیش مسائل کا مؤثر حل اور ان کا اطمینان ہے۔
