نواز شریف سے گزارش ہے کہ مریم نواز کو کراچی بھیج دیں، شاید وہ شہر کو ٹھیک کردیں، وسیم اختر

سابق میئر کراچی اور متحدہ قومی موومنٹ پاکستان کے رہنما وسیم اختر نے سابق وزیراعظم نواز شریف سے مطالبہ کیا ہے کہ وہ وزیراعلیٰ پنجاب مریم نواز کو کراچی بھیجیں، شاید وہ شہر کے مسائل حل کرسکیں۔

یہ بھی پڑھیں: کیا ایم کیو ایم کی اعلی قیادت کراچی کے میئر شپ کے خواب دیکھ رہی ہے؟

لاہور میں یونیورسٹی آف لاہور کے زیر اہتمام ’گورننس، لیکن نظام کیا؟‘کے عنوان سے منعقدہ سیمینار سے خطاب کرتے ہوئے وسیم اختر نے کہا کہ سابق وزیراعظم نواز شریف اپنی بیٹی اور وزیراعلیٰ پنجاب مریم نواز کو کراچی بھیجیں، شاید وہ کراچی کو ٹھیک کردیں۔

انہوں نے کہا کہ کراچی کے لوگ جو مشکلات برداشت کر رہے ہیں، انہیں کس بات کی سزا دی جا رہی ہے؟ آپ لوگ کراچی آ کر دیکھیں کہ وہاں کے حالات کیا ہیں۔

یہ بھی پڑھیں: ’چاہتا ہوں یہ چیزیں نہ ہوں، پارٹی کارکنان سکون کا سانس لیں‘، وسیم اختر کا خالد مقبول صدیقی اور مصطفیٰ کمال کی لفظی جنگ پر ردعمل

وسیم اختر نے کہا کہ وہ گزشتہ روز لاہور آئے تو دیکھا کہ لاہور ماشا اللہ دبئی کا مقابلہ کررہا ہے۔ ان کا کہنا تھا کہ کراچی کے مسائل کے حل کے لیے بھی عملی اقدامات کی ضرورت ہے۔