نوجوان تاجر میر رضا کی موت کی وجوہات اور شناخت سے متعلق مزید شواہد حاصل کرنے کے لیے کراچی کے سوسائٹی قبرستان میں ان کی قبر کشائی کی گئی، جہاں میڈیکل بورڈ کے ارکان، پولیس حکام، اہلخانہ اور وکیل جبران ناصر موجود تھے۔
قبر کشائی کے موقع پر پولیس سرجن، سربراہ شناخت پروجیکٹ اور مجسٹریٹ بھی قبرستان میں موجود رہے جبکہ سیکیورٹی کے لیے پولیس کی بھاری نفری تعینات کی گئی۔
یہ بھی پڑھیں:میر رضا علی قتل کیس: میڈیکل بورڈ کی تبدیلی پر اہلخانہ کا اعتراض، نئی کمیٹی مسترد کردی
میڈیکل بورڈ کے ارکان نے قبر سے مختلف نمونے حاصل کیے، جبکہ میر رضا کی لاش سے ڈی این اے نمونہ بھی لیا جائے گا۔ بورڈ نے ان کے والد اور والدہ کے ڈی این اے نمونے حاصل کرنے کا بھی فیصلہ کیا ہے تاکہ ضروری فرانزک تقابل کیا جاسکے۔
حکام کے مطابق میر رضا کی لاش کے مختلف حصوں کا تفصیلی تجزیہ کیا جائے گا اور میڈیکل بورڈ میں شامل ماہرین اپنے طور پر لاش کا معائنہ کریں گے تاکہ موت سے متعلق اہم شواہد سامنے آسکیں۔
یاد رہے کہ میر رضا کے اہلخانہ نے پہلے 5 رکنی میڈیکل بورڈ کو مسترد کردیا تھا، جس کے بعد حکومت نے سابق میڈیکل بورڈ کو دوبارہ بحال کردیا تھا۔
