اسلام آباد میں تھانہ کورال پولیس نے غوری ٹاؤن میں شہریوں کو ہراساں کرکے سیکیورٹی چارجز کے نام پر بھتہ وصول کرنے والے 2 ملزمان کو گرفتار کرلیا۔
ترجمان اسلام آباد پولیس کے مطابق گرفتار ملزمان کی شناخت کامران مجید اور کاشف کے نام سے ہوئی ہے، جو شہریوں کے گھروں اور پلاٹس پر جا کر بھتہ وصول کرتے تھے۔
یہ بھی پڑھیں: گھریلو ناچاقی پر 2خواتین کا قتل، اسلام آباد پولیس نے 48 گھنٹوں میں ملزمان گرفتار کرلیے
ملزمان بالخصوص غیر رہائشی پلاٹ مالکان کو بلیک میل اور ہراساں کرکے بھاری رقوم وصول کرنے میں ملوث تھے۔
شہریوں کی شکایات کا فوری نوٹس لیتے ہوئے ایس پی سواں زون محمد خرم اشرف نے ملزمان کی گرفتاری کے لیے خصوصی پولیس ٹیم تشکیل دی۔
ایس ایچ او کورال عامر حیات کی زیرنگرانی پولیس ٹیم نے مؤثر کارروائی کرتے ہوئے دونوں ملزمان کو بھتہ وصول کرتے ہوئے رنگے ہاتھوں گرفتار کرلیا۔
مزید پڑھیں: اسلام آباد پولیس کی بڑی کارروائی، ڈرفٹنگ میں ملوث ملزمان گرفتار، گاڑیاں ضبط
ایس ایس پی آپریشنز اسلام آباد قاضی علی رضا نے کہا کہ شہریوں کو دھمکانا، ہراساں کرنا اور بھتہ وصول کرنا ناقابلِ برداشت عمل ہے، ایسے عناصر کے خلاف بلاامتیاز کارروائی کی جائے گی۔
اسلام آباد پولیس نے شہریوں سے اپیل کی ہے کہ کسی بھی قسم کی بھتہ خوری یا ہراساں کیے جانے کی صورت میں فوری طور پر متعلقہ پولیس اسٹیشن یا پولیس ہیلپ لائن پر اطلاع دیں۔
