محکمہ موسمیات نے مون سون اور مغربی ہواؤں کے نئے سلسلے کے پیش نظر 28 اگست سے 6 ستمبر تک ملک کے بالائی علاقوں، خیبر پختونخوا، پنجاب اور کشمیر میں تیز ہواؤں اور گرج چمک کے ساتھ موسلادھار بارشوں کی پیشگوئی کی ہے۔
محکمہ موسمیات کے مطابق شدید بارشوں کے باعث بڑے شہروں میں اربن فلڈنگ، ندی نالوں میں طغیانی اور پہاڑی علاقوں میں لینڈ سلائیڈنگ کے پیش نظر مسافروں، سیاحوں اور کسانوں کے لیے خصوصی حفاظتی ایڈوائزری جاری کر دی گئی ہے۔
مغربی ہواؤں کا نیا سلسلہ اور کشمیر میں بارشیں
محکمہ موسمیات کے مطابق مون سون ہوائیں ملک کے بالائی علاقوں میں داخل ہو رہی ہیں، جبکہ 31 اگست سے مغربی ہواؤں کا ایک نیا سلسلہ بھی ان علاقوں کا رخ کرے گا جو 5 ستمبر تک برقرار رہے گا۔
یہ بھی پڑھیں:موسلا دھار بارشیں، مختلف شہر زیرِ آب، تاجروں کو کروڑوں کا نقصان
اس موسمی نظام کے زیر اثر کشمیر کے مختلف علاقوں بشمول نیلم ویلی، مظفرآباد، راولاکوٹ، پونچھ، ہٹیاں، باغ، حویلی، سدھنوتی، کوٹلی، بھمبر اور میرپور میں 28 اگست کی رات سے 6 ستمبر تک وقفے وقفے سے موسلادھار بارش اور گرج چمک کا امکان ہے۔
اسلام آباد، پنجاب اور خیبر پختونخوا کی موسمی صورتحال
وفاقی دارالحکومت اسلام آباد اور بالائی پنجاب میں 29 اگست سے 5 ستمبر تک بادل برسنے کی توقع ہے۔ راولپنڈی، مری، گلیات، جہلم، چکوال، لاہور اور سیالکوٹ سمیت دیگر ملحقہ شہروں میں تیز ہواؤں کے ساتھ بارش متوقع ہے۔
دریں اثنا، وسطی اور زیریں پنجاب کے علاقوں جیسے قصور، ساہیوال، فیصل آباد اور لیہ میں 1 سے 5 ستمبر تک بارش کا امکان ظاہر کیا گیا ہے۔
خیبر پختونخوا کے بیشتر اضلاع بشمول پشاور، سوات، دیر اور چترال میں بھی 29 اگست سے 5 ستمبر تک موسلادھار بارش متوقع ہے، جبکہ ڈی آئی خان، بنوں اور وزیرستان میں 1 سے 4 ستمبر تک بادل برسیں گے۔
گلگت بلتستان میں بارشیں، سندھ اور بلوچستان میں گرمی
گلگت بلتستان کے علاقوں دیامر، استور، سکردو اور ہنزہ میں 30 اگست سے 6 ستمبر تک بارش اور گرج چمک کی پیشگوئی کی گئی ہے۔
دوسری جانب سندھ اور بلوچستان کے بیشتر علاقوں میں آنے والے دنوں میں موسم گرم اور مرطوب رہنے کا امکان ہے اور وہاں کسی خاطر خواہ موسمیاتی تبدیلی کی توقع نہیں ہے۔
اربن فلڈنگ، لینڈ سلائیڈنگ اور حفاظتی تدابیر
محکمہ موسمیات نے خبردار کیا ہے کہ 31 اگست سے 5 ستمبر کے دوران مسلسل بارشوں کی وجہ سے اسلام آباد، راولپنڈی، لاہور، گوجرانوالہ اور مردان سمیت کئی بڑے شہروں میں اربن فلڈنگ کا شدید خطرہ ہے۔
اس کے علاوہ مری، گلیات، کشمیر اور خیبر پختونخوا کے پہاڑی علاقوں میں مقامی ندی نالوں میں طغیانی، فلیش فلڈ اور لینڈ سلائیڈنگ کے واقعات رونما ہو سکتے ہیں۔
حکام نے مسافروں اور سیاحوں کو موسمی صورتحال کے پیش نظر غیر ضروری سفر سے گریز کرنے کی سختی سے ہدایت کی ہے، جبکہ کسانوں کو مشورہ دیا گیا ہے کہ وہ اپنی زرعی سرگرمیاں موسمی حالات کو مدنظر رکھ کر ترتیب دیں۔
موسمیاتی تبدیلیاں اور مون سون کے اثرات
پاکستان کو حالیہ برسوں میں موسمیاتی تبدیلیوں کے باعث غیر متوقع اور شدید موسمی حالات کا سامنا رہا ہے۔ مون سون کے موسم میں اکثر وبیشتر سیلابی صورتحال، لینڈ سلائیڈنگ اور اربن فلڈنگ جیسے چیلنجز جنم لیتے ہیں جس سے جانی و مالی نقصان کا خدشہ رہتا ہے۔
پیشگی الرٹ اور احتیاطی تدابیر کے ذریعے نقصانات کی شرح کو کم کرنے کی کوشش کی جاتی ہے تاکہ عوام اور متعلقہ ادارے کسی بھی ہنگامی صورتحال سے بروقت نمٹ سکیں اور محفوظ رہ سکیں۔
