بھارت کے شہر بنگلورو میں ایک معروف نجی کلب کے کچن کو حفظانِ صحت کے ناقص انتظامات اور زائد المیعاد اشیائے خورونوش کی موجودگی پر بند کر دیا گیا۔
حکام نے کارروائی کے دوران 40 کلو گرام زائد المیعاد مرچیں اور دیگر غذائی اشیا بھی ضبط کرلیں۔
محکمہ فوڈ سیفٹی اینڈ ڈرگ ایڈمنسٹریشن کے فوڈ سیفٹی ونگ نے ریاستی وزیر صحت یو ٹی قادر کی ہدایت پر 3 ستمبر کو سہاکارن نگر میں گریٹر بنگلورو اتھارٹی کے زیر انتظام چیئرمینز کلب کا معائنہ کیا۔
یہ بھی پڑھیں: بھارت: فائیو اسٹار ہوٹلوں کے کھانوں میں بدبودار گوشت، سبزیاں اور زائدالمیعاد دودھ کا استعمال
محکمے کے مطابق معائنے کے دوران فوڈ سیفٹی اینڈ اسٹینڈرڈز ایکٹ 2006 اور فوڈ سیفٹی اینڈ اسٹینڈرڈز رولز 2011 کی متعدد خلاف ورزیاں سامنے آئیں۔
حکام کے مطابق کچن میں خوراک کی تیاری کے لیے 40 کلو گرام زائد المیعاد مرچیں ذخیرہ کی گئی تھیں، اس کے علاوہ 5 کلو گرام بریڈ کرمز اور 2 کلو گرام سجیرا فوڈ مصنوعات پر بھی مقررہ قواعد کے برخلاف نامناسب لیبلنگ پائی گئی۔
This Ladies & Gentlemen is the CHAIRMAN'S CLUB & RESORT IN BENGALURU!
One look at their kitchen-storage area & you would probably wanna throw up! Health Dept conducted a suprise inspection last night & sealed the kitchen over highly unhygienic conditions & expired food items. pic.twitter.com/223ltaNPri
— Deepak Bopanna (@dpkBopanna) September 4, 2026
معائنے کے دوران خوراک کی تیاری اور ذخیرہ کرنے والے مقامات پر انتہائی ناقص اور غیرصحت بخش حالات بھی سامنے آئے۔
حکام نے خوراک میں غیرمجاز یا ممنوعہ مصنوعی رنگوں کے استعمال یا ذخیرہ کیے جانے کی نشاندہی بھی کی۔
محکمہ فوڈ سیفٹی اینڈ ڈرگ ایڈمنسٹریشن کے کمشنر سری نواس کے مطابق کچن میں صفائی ستھرائی کے ناقص انتظامات کے علاوہ زائد المیعاد اشیائے خورونوش بھی پائی گئیں، جنہیں ضبط کرلیا گیا۔
مزید پڑھیں: مہاراشٹر کے اسکولوں اور اطراف میں وڑا پاؤ، سموسے سمیت جنک فوڈ پر پابندی
فوڈ سیفٹی اور حفظانِ صحت سے متعلق سنگین خامیوں کے پیش نظر کلب کے کچن کو بند کر دیا گیا۔
محکمے نے مزید بتایا کہ کلب انتظامیہ خوراک کو ذخیرہ کرنے اور سنبھالنے سے متعلق مطلوبہ حفاظتی اقدامات پر عمل کرنے میں ناکام رہی۔
معائنے کے دوران سبزی اور گوشت پر مشتمل غذائی اشیا ایک ساتھ ذخیرہ کی گئی تھیں۔
مزید پڑھیں: محکمہ فوڈ کے اسٹورز اور گوداموں پر چھاپے، امپورٹڈ ایکسپائرڈ سامان قبضے میں لے لیا گیا
حکام کے مطابق کلب کے خلاف فوڈ سیفٹی اینڈ اسٹینڈرڈز ایکٹ 2006 اور متعلقہ قواعد کے تحت مزید قانونی کارروائی شروع کر دی گئی ہے۔
محکمہ فوڈ سیفٹی اینڈ ڈرگ ایڈمنسٹریشن نے کہا ہے کہ فوڈ سیفٹی اور حفظانِ صحت کے معیار کی خلاف ورزی کرنے والے کاروباری مراکز کے خلاف مسلسل معائنے اور سخت قانونی کارروائی جاری رکھی جائے گی۔
