وزیراعظم آزاد حکومت ریاست جموں و کشمیر افتخار گیلانی نے اپنی کابینہ کے وزرا میں محکموں کی تقسیم کر دی ہے۔
سروسز اینڈ جنرل ایڈمنسٹریشن ڈیپارٹمنٹ کی جانب سے جاری کردہ نوٹیفکیشن کے مطابق وزیراعظم نے آزاد حکومت ریاست جموں و کشمیر قواعد کار نظرثانی شدہ 1985 کے قاعدہ 3 کے ذیلی قاعدہ 4 کے تحت حاصل اختیارات کو بروئے کار لاتے ہوئے یہ تقسیم عمل میں لائی ہے۔
آزاد کشمیر کے تمام وزراء کو محکمے الاٹ کردئیے گئے،نوٹیفکیشن جاری pic.twitter.com/lFUceMDihr
— Hussain Ahmed Ch (@HussainAhmedCh8) September 5, 2026
جاری کردہ نوٹیفکیشن کے مطابق سردار میر اکبر خان کو فزیکل پلاننگ اینڈ ہاؤسنگ اور باغ ڈویلپمنٹ اتھارٹی کا قلمدان سونپا گیا ہے۔
وقار احمد نور کو وزارت جنگلات، وائلڈ لائف اور فشریز کی ذمہ داری دی گئی ہے، جبکہ ڈاکٹر مصطفیٰ بشیر عباسی وزیر صحت عامہ ہوں گے۔
اظہر صادق کو محکمہ ہائیر ایجوکیشن، ثاقب مجید راجا کو توانائی و آبی وسائل کا محکمہ تفویض کیا گیا ہے۔
اسی طرح راجا ریاست خان وزیر مال و بحالیات، سردار عمیر نعیم وزیر ایلیمنٹری و سیکنڈری ایجوکیشن جبکہ عبدالرحمان آرائیں کو سیاحت، صنعت، محنت اور معدنی وسائل کے محکموں کا قلمدان دیا گیا ہے۔
واضح رہے کہ گزشتہ روز آزاد کشمیر کی 8 رکنی کابینہ کا اعلان کیا گیا تھا، جن سے قائم مقام صدر چوہدری طارق فاروق نے حلف لیا تھا۔
