ایشیا کپ رائزنگ اسٹارز چیمپیئن شپ 2026 کے شیڈول کا اعلان، پاک بھارت ٹیمیں 22 نومبر کو آمنے سامنے ہوں گی

ایشین کرکٹ کونسل (اے سی سی) نے ہفتے کو ایشیا کپ رائزنگ اسٹارز چیمپیئن شپ 2026 کے مکمل میچ شیڈول کا اعلان کر دیا جو 19 سے 29 نومبر تک قطر کے دارالحکومت دوحہ میں کھیلی جائے گی۔

یہ بھی پڑھیں: جنوبی افریقہ کے مائیکل اسمتھ پاکستان کرکٹ ٹیم کے نئے بیٹنگ کوچ مقرر

اگلے ماہ قطر کے دارالحکومت میں 2 مقامات پر منعقد ہونے والی اس چیمپین شپ میں کل 8 ٹیمیں شامل ہوں گی جنہیں 4،4 کے 2 گروپس میں تقسیم کیا گیا ہے۔

گروپ اے میں دفاعی چیمپیئن پاکستان شاہینز، ان کی روایتی حریف انڈیا اے، نیپال اور متحدہ عرب امارات شامل ہیں جبکہ گروپ بی میں سری لنکا اے، بنگلہ دیش اے، افغانستان اے اور ہانگ کانگ، چائنا شامل ہیں۔

ٹورنامنٹ کا آغاز 19 نومبر کو ہوگا جب بنگلہ دیش اے کا مقابلہ پردہ اٹھانے والے میچ میں ہانگ کانگ سے یونیورسٹی آف دوحہ فار سائنس اینڈ ٹیکنالوجی (یو ڈی ایس ٹی) کرکٹ گراؤنڈ میں ہوگا جبکہ سری لنکا اے کا مقابلہ افغانستان اے سے ویسٹ اینڈ انٹرنیشنل کرکٹ اسٹیڈیم (ڈبلیو ای آئی سی ایس) میں اسی دن ہوگا۔

پاکستان شاہینز 20 نومبر کے صبح کے فکسچر میں یو اے ای کے خلاف اپنا میچ کھیلیں گے جبکہ ان کے انڈیا اے کا مقابلہ دوسرے دن نیپال سے ہوگا۔

مزید پڑھیے: بھارتی ٹیم کا ایشیا کپ ٹرافی نہ لینے کا ڈراما: پروٹوکول توڑنا ہے تو بھارت ایسے ٹورنامنٹس میں شرکت ہی نہ کرے، سابق کرکٹر مدن لال

دونوں روایتی حریفوں کا آمنا سامنا 22 نومبر کو دوحہ کے ڈبلیو ای آئی سی ایس میں ہوگا جبکہ پاکستان کا آخری گروپ مرحلہ میچ 24 نومبر کو نیپال کے خلاف شیڈول ہے۔ اسی دن بھارت کا مقابلہ یو اے ای سے ہوگا۔

لیگ مرحلے کی تکمیل کے بعد ہر گروپ سے ٹاپ 2 ٹیمیں سیمی فائنل میں پہنچیں گی۔

پہلا سیمی فائنل گروپ اے کے ٹاپر اور دوسرے گروپ کی دوسرے نمبر کی ٹیم کے درمیان 26 نومبر کو کھیلا جائے گا جبکہ دوسرا ناک آؤٹ فکسچر اگلے دن کھیلا جائے گا۔

سیمی فائنل کی فاتح ٹیمیں اس کے بعد بلاک بسٹر فائنل میں مدمقابل ہوں گی جو 29 نومبر کو ڈبلیو ای آئی سی ایس میں کھیلا جائے گا۔