پاکستان اور آئی ایم ایف کے درمیان 7 ارب ڈالر کے ایکسٹینڈڈ فنڈ فیسیلٹی (ای ایف ایف) کے چوتھے جائزے اور ریزیلینس اینڈ سسٹین ایبلٹی فیسیلٹی (آر ایس ایف) کے تیسرے جائزے پر اسٹاف لیول معاہدہ طے پانے کے بعد پاکستان اسٹاک ایکسچینج میں جمعرات کو تیزی کا رجحان دیکھا گیا۔
صبح 11 بج کر 10 منٹ پر بینچ مارک کے ایس ای 100 انڈیکس 569.12 پوائنٹس یعنی 0.34 فیصد اضافے کے ساتھ 169,149.52 پوائنٹس پر ٹریڈ کر رہا تھا۔
یہ بھی پڑھیں: عالمی معیشت میں بہتری: اسٹاک مارکیٹ اور سونے چاندی میں سرمایہ کاری کب کی جائے؟
مارکیٹ میں اہم شعبوں کے حصص میں خریداری دیکھی گئی، جن میں آٹو موبائل اسمبلی، سیمنٹ، کمرشل بینک، تیل و گیس کی تلاش، آئل مارکیٹنگ کمپنیوں اور بجلی پیدا کرنے والی کمپنیوں کے حصص نمایاں رہے۔
لکی سیمنٹ، مسلم کمرشل بینک، میزان بینک، نیشنل بینک، یونائیٹڈ بینک، ماری پیٹرولیم، او جی ڈی سی ایل، پاکستان اسٹیٹ آئل، حب پاور اور اٹک ریفائنری سمیت انڈیکس پر اثرانداز ہونے والے اہم حصص میں مجموعی طور پر مثبت کاروبار دیکھا گیا۔
Ali Najib, deputy head of trading at Arif Habib Ltd, said PSX witnessed a consolidation session.
Article by @thenews_intl https://t.co/FFadvv2GOj
— Arif Habib Limited (@ArifHabibLtd) October 8, 2026
آئی ایم ایف اور پاکستانی حکام کے درمیان طے پانے والا اسٹاف لیول معاہدہ اب آئی ایم ایف کے ایگزیکٹو بورڈ کی منظوری سے مشروط ہے۔
منظوری کی صورت میں پاکستان کو ای ایف ایف کے تحت تقریباً ایک ارب ڈالر جبکہ آر ایس ایف کے تحت تقریباً 210 ملین ڈالر دستیاب ہوں گے۔
یوں دونوں پروگراموں کے تحت پاکستان کو مجموعی طور پر تقریباً 5.7 ارب ڈالر کی رقوم موصول ہو جائیں گی۔
مزید پڑھیں: لائیو اسٹاک اور زراعت پر توجہ دے کر ایک سال میں معیشت بہتر کی جا سکتی ہے، وزیراعظم شہباز شریف
اس سے قبل بدھ کو بھی پاکستان اسٹاک ایکسچینج میں نچلی سطح پر خریداری کے باعث مارکیٹ نے انٹرا ڈے منافع کے حصول کے دباؤ سے نکل کر مثبت اختتام کیا تھا۔
بینچ مارک کے ایس ای 100 انڈیکس 120.30 پوائنٹس یعنی 0.07 فیصد اضافے سے 168,580.41 پوائنٹس پر بند ہوا تھا۔
دوسری جانب عالمی مارکیٹوں میں جمعرات کو ایشیائی حصص دباؤ کا شکار رہے، خودمختار بانڈ مارکیٹوں میں بڑھتے دباؤ، بڑی ٹیکنالوجی کمپنیوں کی جانب سے قرض حاصل کرنے کی اطلاعات اور تیل کی قیمتوں میں اضافے نے عالمی سرمایہ کاروں کے محتاط رویے کو تقویت دی۔
جاپان کا نکی انڈیکس 0.9 فیصد جبکہ جنوبی کوریا کی مارکیٹ 0.6 فیصد نیچے آئی، جاپان کے علاوہ ایشیا بحرالکاہل کے حصص کا ایم ایس سی آئی انڈیکس بھی 0.1 فیصد کم ہوا۔
ادھر مصنوعی ذہانت کے شعبے میں سرمایہ کاری کے لیے اسپیس ایکس، براڈکام اور اوریکل کی جانب سے بڑے پیمانے پر قرض حاصل کرنے کی اطلاعات نے بھی عالمی مالیاتی منڈیوں میں تشویش پیدا کی، جس کے نتیجے میں اسپیس ایکس کے حصص اور بانڈز دباؤ میں آگئے۔
