پاکستان کی نئی ٹی20 کرکٹ ٹیم نے راولپنڈی کرکٹ اسٹیڈیم میں دوسرے ٹی 20 میچ میں بھی سری لنکا کو 82 رنز کے بڑے مارجن سے شکست دے کر ثابت کیا کہ اس کا چھکے لگانے کا ریکارڈ اور اسٹرائیک ریٹ انتہائی عمدہ ہے۔
بطور کپتان اپنی پہلی ہی اسائنمنٹ میں پاکستان کو سیریز جتوانے والے صاحبزادہ فرحان نے عزم ظاہر کیا ہے کہ ٹیم آئندہ میچز میں بھی اپنے اس ’جارحانہ کھیل‘ کو برقرار رکھے گی۔ اتوار کو کھیلے گئے میچ میں گرین شرٹس نے ہر شعبے میں شاندار کھیل پیش کیا۔
معاذ صداقت اور کپتان کی دھواں دھار بیٹنگ
واضح رہے کہ میچ میں بائیں ہاتھ کے نوجوان بیٹر معاذ صداقت نے 51 گیندوں پر 6 چوکوں اور 7 چھکوں کی مدد سے 96 رنز کی لاجواب اننگز کھیلی۔ وہ بدقسمتی سے اپنی پہلی سینچری سے تو محروم رہے لیکن انہوں نے ٹیم کے لیے ایک بہت بڑے اسکور کی بنیاد رکھ دی۔
یہ بھی پڑھیں:پاکستان بمقابلہ سری لنکا ٹی 20 سیریز: ٹکٹس کی فروخت کا آغاز، راولپنڈی میں کرکٹ شائقین کے لیے رعایت
کپتان صاحبزادہ فرحان نے اس نوجوان بیٹر کا بھرپور ساتھ دیتے ہوئے 44 گیندوں پر 4 چوکوں اور 5 چھکوں کی مدد سے جارحانہ 73 رنز بنائے، جو اس سیریز میں ان کی مسلسل دوسری نصف سینچری تھی۔
دیگر کھلاڑیوں کا تعاون اور بڑا ہدف
اس کے علاوہ فخر زمان نے 17 گیندوں پر 4 باؤنڈریز کی مدد سے 22 رنز اسکور کیے۔ اننگز کے آخر میں حسن نواز نے محض 9 گیندوں پر 1 چوکے اور 1 چھکے کی مدد سے 19 رنز کی ناقابل شکست اننگز کھیل کر ٹیم کے مجموعی اسکور کو مزید مضبوط کیا۔
سری لنکا کو جیت کے لیے 216 رنز کا پہاڑ جیسا ہدف ملا، لیکن پاکستانی بولرز نے انتہائی نظم و ضبط کا مظاہرہ کرتے ہوئے مہمان ٹیم کو مقررہ 20 اوورز میں 7 وکٹوں کے نقصان پر صرف 133 رنز پر روک دیا۔
پاکستان کی جانب سے بولنگ اٹیک میں عمران رندھوا نے سب سے نمایاں کارکردگی دکھائی اور اپنے 4 اوورز کے کوٹے میں صرف 11 رنز دے کر 3 اہم وکٹیں حاصل کیں۔
سلمان مرزا نے 2 کھلاڑیوں کو آؤٹ کیا جبکہ صائم ایوب اور شاداب خان کے حصے میں ایک ایک وکٹ آئی۔
کپتان کا آئندہ میچز کے حوالے سے عزم
میچ کے بعد پریزنٹیشن کے دوران گفتگو کرتے ہوئے کپتان صاحبزادہ فرحان نے ٹیم کے بیٹنگ اپروچ پر مکمل اعتماد کا اظہار کیا۔
مزید پڑھیں:ایشین گیمز 2026: صاحبزادہ فرحان پاکستان مینز کرکٹ ٹیم کے کپتان مقرر، 15 رکنی اسکواڈ کا اعلان
انہوں نے کہا کہ پاور پلے میں کم اسکور کے باوجود انہیں پورا یقین تھا کہ ٹیم 200 سے زیادہ رنز بنانے میں کامیاب ہو جائے گی۔
فرحان کا مزید کہنا تھا کہ سال 2026 میں پاکستان ایک بالکل مختلف ٹی 20 سائیڈ بن چکی ہے، جہاں ہمارا چھکے لگانے کا تناسب بہتر ہوا ہے اور ہمارے بیٹرز 150 سے زیادہ کے اسٹرائیک ریٹ سے اسکور کر رہے ہیں۔
انہوں نے یقین دہانی کرائی کہ اگر ٹیم اسی طرح کھیلتی رہی تو ہر بار 200 سے زیادہ رنز بنائے گی اور آنے والے میچ میں بھی بالکل اسی شدت سے میدان میں اتری جائے گی۔
