نگران وزیرصحت ڈاکٹر ندیم جان نے کہا ہے کہ پاکستان میں صحت کے شعبے میں تحقیق پر خصوصی توجہ مرکوز کرنے کی ضرورت ہے، صحت کے شعبہ کی بہتری حکومت کی اولین ترجیح ہے، عہدہ سنبھالتے ہی پاکستان میں صحت کے شعبہ پر خصوصی توجہ دی۔
اتوار کو نیشنل ہیلتھ ریسرچ کانفرنس سے خطاب کرتے ہوئے ندیم جان نے کہا کہ پاکستان میں اب بھی پولیو کا مرض پایا جاتا ہے، بدقسمتی سے ایڈز کے کیسز بھی سامنے آرہے ہیں، اس میں ہم کیوں پیچھے رہ گئے اس پر غور کی ضرورت ہے۔
ندیم جان نے کہاکہ بڑھتی آبادی کے پیش نظر صحت کے شعبہ میں مزید اقدامات کی ضرورت ہے۔ پاکستان میں صلاحیتوں کی کمی نہیں ہے، ہمیں دیکھنا ہوگا کہ ہم تحقیق کے شعبہ میں دنیا سے پیچھے کیوں ہیں، تحقیق کے شعبے میں پیچھے رہ جانے کی ایک بنیادی وجہ فنڈز کی کمی ہے۔
مزید پڑھیں
انہوں نے کہاکہ پولیو کے خاتمے کی مہم کے دوران جتنی جانی قربانیاں ہم نے دی ہیں دنیا میں اس کی مثال نہیں ملتی۔ 100 سے زیادہ عملے نے اپنی جانیں دی ہیں۔ ہم نے 600 ملین ڈالر اپنی طرف سے اس کاوش میں لگایا ہے۔ ہمارے پاس صلاحیتوں کی کمی نہیں صرف عزم کی کمی ہے۔
ندیم جان نے کہاکہ فنڈزکے استعمال میں شفافیت ایک بڑا مسئلہ ہے، پاکستان اورافغانستان کا المیہ یہ ہے کہ اربوں روپے کے خرچ کے باوجود کوئی تبدیلی نہیں نظر آتی۔ افغانستان میں بھی معیاری اسپتال قائم نہیں ہوسکے آج بھی ایک بڑی تعداد علاج کے لیے دوسرے ممالک سفر کرتی ہے۔
یہ بھی پڑھیں ‘تعلیم اور صحت پر توجہ نہ دی تو پاکستان 2047 تک غریب ترین ملکوں میں شامل ہوجائے گا’
انہوں نے کہا کہ پاکستان میں آنے والا ایک ایک پیسہ قابل احتساب ہونا چاہیے اور وہ اپنی جگہ پر استعمال ہونا چاہیے۔
ندیم جان نے کہا کہ ہم پاکستان کے درست تاثر کو اجاگر کریں گے۔ صحت کے شعبہ میں بڑی تبدیلی دیکھیں گے، ہم چیلنجز سے نمٹنے کے لیے دن رات کام کریں گے۔ پاکستان کوکئی چیلنجز کاسامنا ہے تاہم ہم بطور ریاست وحکومت اپنے عوام کی صحت کی سہولیات کے ذمہ دار ہیں، ہم اپنے معاونین کو بتائیں گے کہ وہ صحت میں کہاں فنڈنگ کریں۔
