انتظار کی گھڑیاں ختم ہونے کو ہیں، آئی فون 15 منگل 12 ستمبر کو لانچ ہو رہا ہے، جس میں 4 نئے ماڈلز کے ساتھ 5 نئے فیچرز کو متعارف کرایا گیا ہے۔
آئی فون 15 کی نئی سیریز میں مزید نئے رنگوں کو شامل کیا گیا ہے، سائز اور شیپ میں بھی معمولی تبدیلی کی گئی ہے، نئی سیریز آئی فون 15، آئی فون 15 پلس، آئی فون 15 پرو اور آئی فون 15 پرو میکس پر مشتمل ہے۔
اس بار آئی فون 15 میں 11 سال کے بعد سب سے اہم تبدیلی کرتے ہوئے چارجنگ پورٹ کو تبدیل کر دیا گیا ہے، نئے آئی فون میں چارجنگ پورٹ یو ایس بی سی ٹائپ انسٹال کی گئی ہے۔ جس کے باعث ڈیٹا ٹرانسفرنگ مزید تیز اور بہتر ہو جائے گی۔
ایپل کمپنی نے یورپین ممالک کے تقاضے پر آئی فون کے نئے ماڈلز میں یونیورسل یو ایس بی چارجنگ پورٹ شامل کی ہے۔
مزید پڑھیں
اس سال کے آئی فون پرو ماڈلز کے لیے ٹائٹینیئم (Titanium) فریم استعمال کی گئی ہے جس کے باعث نئے ماڈل کا وزن گزشتہ سال کے پرو ماڈلز کے مقابلے میں کم ہے۔
آئی فون 15 کے پرو ماڈلز، 15 پرو اور 15 پرو میکس میں نئی اے 17 بائیونک چپ شامل کی گئی ہے جس کے باعث نئے ماڈلز کی اسپیڈ گزشتہ ماڈلز کے مقابلے میں تیز بتائی جا رہی ہے۔
نئے ماڈلز میں ایک اور اہم تبدیلی کی گئی ہے، اس سال پرو ماڈلز کے لیے سائیلنٹ سوئچ کی جگہ ایکشن بٹن کا اضافہ کیا گیا ہے، جس کو متعدد کاموں کے لیے استعمال کیا جا سکے گا۔
آئی فون 15 پرو ماڈلز کے لیے گزشتہ ماڈلز کی نسبت ریم میں 2 جی بی کا مزید اضافہ کیا گیا ہے جو کہ اب 8 جی بی ریم کر دیا گیا ہے، اور ساتھ ہی کیمرا سیٹ اپ میں پیری اسکوپ فوٹو کیمرا شامل کیا گیا ہے جس کے بعد آپٹیکل زوم میں کافی اضافہ دیکھنے کو ملے گا۔
مختلف مارکیٹنگ کمپنیوں کے مطابق آئی فون کے نئے ماڈلز کی قیمت میں 200 ڈالرز تک کا اضافہ کیا جائے گا، لیکن ابھی واضح نہیں کہ قیمت میں کتنا اضافہ کیا جا سکتا ہے۔
