سعودی عرب کے ولی عہد شہزادہ محمد بن سلمان نجی دورے پر عمان پہنچ گئے ہیں جہاں وہ سلطنت عمان کے سلطان ہیثم بن طارق سے ملاقات کریں گے۔
سعودی ولی عہد شہزادہ محمد بن سلمان جی 20 اجلاس کے اختتام کے بعد پیر کو بھارت سے عمان کے لیے روانہ ہوئے تھے۔
جی 20 اجلاس کے بعد نئی دہلی میں ایک خصوصی تقریب کا اہتمام کیا گیا تھا جس میں سعودی ولی عہد شہزادہ محمد بن سلمان اور بھارتی وزیراعظم نریندر مودی کی موجودگی میں دونوں ملکوں کے حکام کے درمیان کم از کم 50 معاہدے اور سمجھوتے طے پائے تھے۔
ان میں توانائی، پیٹرو کیمیکل ، قابلِ تجدید توانائی، زراعت اور صنعت کے علاوہ سماجی و ثقافتی شعبوں میں دوطرفہ تعاون بڑھانے کے معاہدے شامل ہیں۔
مزید پڑھیں
واضح رہے نگراں وفاقی وزیر اطلاعات مرتضی سولنگی نے ایک بیان میں کہا تھا کہ سعودی ولی عہد محمد بن سلمان کسی بھی وقت پاکستان کا دورہ کرسکتے ہیں۔
نگران وزیر خارجہ جلیل عباس جیلانی بھی اپنے ایک بیان میں کہہ چکے ہیں کہ سعودی ولی عہد شہزادہ محمد بن سلمان جلد ہی پاکستان کا دورہ کریں گے۔
ایک نیوز چینل سے گفتگو کرتے ہوئے نگران وزیر خارجہ نے کہا تھا کہ سعودی ولی عہد کے دورہ پاکستان کے شیڈول کی ابھی تک تصدیق نہیں ہوئی۔ تاہم ان کا کہنا تھا کہ یہ دورہ ملک کی معاشی ترقی کے لیے انتہائی اہم ہوگا۔
انہوں نے کہا کہ اس دورے کے دوران زراعت، کان کنی، توانائی اور آئی ٹی کے شعبوں میں متعدد معاہدے طے پانے کی امید ہے۔
