سپریم کورٹ پریکٹس اینڈ پروسیجر ایکٹ کیس میں عدالت عظمٰی کے فیصلہ کو سراہتے ہوئے سابق وفاقی وزیر قانون اعظم نزیر تارڑ کا کہنا ہے کہ انہیں خوشی ہے کہ پارلیمنٹ کے بنائے ہوئے قانون کی حوصلہ افزائی ہوئی ہے۔
گزشتہ روز سپریم کورٹ کی جانب سے سنائے گئے اس فیصلہ پر اپنا رد عمل دیتے ہوئے لیگی سینیٹراورسابق وزیرقانون اعظم نذیرتارڑ کا کہنا تھا کہ سپریم کورٹ نے اس قانون کو برقرار رکھا ہے، سپریم کورٹ نے اس بات کا احاطہ کیا ہے کہ قانون سازی کرنا پارلیمنٹ کا اختیار ہے۔
اعظم نذیر تارڑ کا کہنا تھا کہ اپیل کے معاملے پر سپریم کورٹ نے بھی اپنا مختلف فیصلہ دیا ہے تاہم الیکشن ایکٹ میں ترمیم کے بعد نواز شریف کے معاملے پر یہ اپیل اتنی اہم نہیں ہے۔ الیکشن ایکٹ میں ترمیم کے بعد تاحال وہ معاملہ چیلینج نہیں ہوا اور وہ رائج الوقت ہے۔
’نواز شریف کی نااہلی سپریم کورٹ کی آبزرویشن کے بعد ختم ہوگئی ہے، نااہلی کے حوالے سے الیکشن ایکٹ میں ترمیم کے بعد نواز شریف اب اہل ہیں۔‘
سابق وزیر قانون اعظم نذیر تارڑ کے مطابق نیب سے متعلق باقی جن مقدمات کا نواز شریف کو سامنا ہے وہ ان کی وطن واپسی پر میرٹ پر دیکھے جائیں گے۔
