پنجاب فوڈ اتھارٹی ملاوٹی دودھ کی روک تھام کے لیے سرگرم ہے۔ سرگودھا شہر کے داخلی اور خارجی راستوں پر ناکہ بندی کے دوران 7 ہزار لیٹر دودھ کی چیکنگ کی گئی جس میں سے ملاوٹ شدہ اور غیرمعیاری 2030 لیٹر ملاوٹی دودھ کوفوری موقع پر ہی تلف کردیا گیا اور 3 دودھ کے سپلائرز کو 46 ہزار روپے کے جرمانے عائد کردیے گئے۔
پنجاب فوڈ اتھارٹی کے ترجمان کے مطابق وٹرنری آفیسر سرگودھا نے شہر کے داخلی اور خارجی راستوں پر ناکہ بندی کے دوران 21 دودھ بردار گاڑیوں میں موجود دودھ کو ٹیسٹ کیا۔ انہوں نے اس موقع پر17 گاڑیوں کے سیمپل پاس کیے جبکہ 4 گاڑیوں میں موجود دودھ کے سیمپلز کو فیل قرار دیا۔
ٹیسٹ کے دوران دودھ میں پانی کی ملاوٹ، فیٹ کی کمی پائی گئی تھی۔ سیمپلز فیل ہونے پر 2 ہزار 30 لیٹر غیر معیاری دودھ کوتلف کردیا گیا۔
اس موقع پر وٹرنری آفیسر پنجاب فوڈ اتھارٹی سرگودھا کا کہنا تھا کہ پنجاب بھر میں دودھ کی ٹیسٹنگ کا عمل جاری ہے۔ دودھ ایک بنیادی غذا ہے جس میں ملاوٹ ہرگز برداشت نہیں کی جائے گی۔
