الیکشن کمیشن: پی ٹی آئی کا انتخابی نشان بلا برقرار، 20 دن میں انٹرا پارٹی الیکشن کرائے جائیں

الیکشن کمیشن نے پاکستان تحریک انصاف (پی ٹی آئی) انٹرا پارٹی الیکشن کیس پر محفوظ فیصلہ سناتے ہوئے انتخابی نشان بلا برقرار رکھتے ہوئے کہا کہ پارٹی 20 دن کے اندر انٹرا پارٹی الیکشن کروائے جائیں۔

الیکشن کمشین کی جانب سے جاری کردہ فیصلے کے مطابق پاکستان تحریک انصاف کو 20 دن کے اندر انٹرا پارٹی الیکشن کرانے کی ہدایت کی گئی ہے۔ پارٹی الیکشن نہ کرانے پر پی ٹی آئی والے انتخابی نشان کے لیے نا اہل ہوں گے۔

الیکشن کمیشن نے اپنے فیصلے میں لکھا کہ پی ٹی آئی کے انٹرا پارٹی الیکشن آئین کے تحت شفاف نہیں تھے۔ اگر بلے کے نشان کو برقرار رکھنا ہے تو پارٹی 20 دن کے اندر انٹرا پارٹی الیکشن کروائے۔

واضح رہے پاکستان تحریک انصاف (پی ٹی آئی) بلے کے نشان کے لیے اہل ہے کہ نہیں؟ الیکشن کمیشن آف پاکستان نے تحریک انصاف کے انٹرا پارٹی انتخابات سے متعلق 13 ستمبر کو فیصلہ محفوظ کیا تھا جو جمعرات کو 12 بجے سنایا جانا تھا۔

الیکشن کمیشن نے پی ٹی آئی کو 2 اگست کو نوٹس جاری کیا تھا کہ انٹرا پارٹی الیکشن نہ کروانے پر پی ٹی آئی کو بلے کے نشان کے لیے نااہل کیوں نہ کیا جائے۔

سماعت کے دوران پی ٹی آئی کے وکیل بیرسٹر گوہر نے بتایا تھا کہ انٹرا پارٹی الیکشن پارٹی آئین میں ترمیم سے پہلے ہوئے، بعد میں ہم نے ترامیم واپس لے لی ہیں۔

جس پر الیکشن کمیشن کا کہنا تھا کہ الیکشن کمیشن کو اختیار ہے کہ وہ کیس میں پی ٹی آئی کو درگزر کر دے یا اس کے خلاف فیصلہ سنا دے۔