بابری مسجد کی جگہ پر رام مندر کی تعمیر پر او آئی سی کا سخت ردعمل

اسلامی تعاون تنظیم (او آئی سی) نے بھارت میں بابری مسجد کی جگہ رام مندر کی تعمیر کی مذمت کی ہے۔

اسلامی تعاون تنظیم نے اپنے بیان نے کہا ہے کہ او آئی سی جنرل سیکریٹریٹ نے بھارت کے شہر ایودھیا میں شہید کی گئی بابری مسجد کے مقام پر ’رام مندر‘ کی حالیہ تعمیر اور افتتاح پر شدید تشویش کا اظہار کیا ہے۔

بیان کے مطابق او آئی سی وزرا خارجہ کی کونسل کی طرف سے اپنے گذشتہ اجلاسوں میں ظاہر کیے گئے او آئی سی کے موقف کے مطابق جنرل سیکریٹریٹ ان اقدامات کی مذمت کرتا ہے جن کا مقصد بابری مسجد کی صورت میں اسلامی تہذیب کے نشانات کو مٹانا ہے جو 5 صدیوں سے بالکل اسی جگہ پر قائم رہی۔

یاد رہے کہ بھارت کے وزیر اعظم نریندر مودی نے بابری مسجد کی جگہ پر تعمیر کیے گئے مندر کا افتتاح کر دیا ہے۔

بھارتی سپریم کورٹ نے 2019 میں ’بابری مسجد ‘ کی زمین ہندوؤں کے حوالے کر دی تھی اور مسلمانوں کو ایک علیحدہ پلاٹ الاٹ کرنے کا حکم دیا تھا جہاں نئی مسجد کی تعمیر ابھی شروع نہیں ہوئی ہے۔