نومنتخب صدر مملکت آصف علی زرداری نے عہدے کا حلف اٹھا لیا، حلف برداری کی تقریب ایوان صدر میں منعقد ہوئی، سابق صدرعارف علوی بھی تقریب حلف برداری میں شریک ہوئے۔
چیف جسٹس آف پاکستان جسٹس قاضی فائز عیسیٰ نے نو منتخب صدر آصف علی زرداری سے حلف لیا۔
مزید پڑھیں
ایوان صدر میں منعقدہ تقریب میں وزیر اعظم پاکستان شہباز شریف، بلاول بھٹو، آصفہ بھٹو اور بختاور بھٹو شریک ہوئے۔
تقریب میں چیئرمین جوائنٹ چیفس آف اسٹاف کمیٹی جنرل ساحر شمشاد اور تینوں سروسز چیفس بھی موجود تھے۔ اسپیکر قومی اسمبلی سردار ایاز صادق اور قائد مسلم لیگ ن میاں محمد نواز شریف نے بھی تقریب میں شرکت کی۔
نومنتخب صدر اسلامی جمہوریہ پاکستان آصف علی زرداری کی تقریب حلف برداری میں زندہ ہے بی بی زندہ ہے کے نعروں کی گونج @AAliZardari #PresidentAAZardari pic.twitter.com/yC2feeAcEL
— PPP (@MediaCellPPP) March 10, 2024
اس کے علاوہ صوبائی گورنرز اور غیرملکی سفارتکاروں نے صدر مملکت کی حلف برداری کی تقریب میں شرکت کی۔
یاد رہے کہ آصف زرداری دوسری بار صدر پاکستان منتخب ہوئے ہیں، گزشتہ روز قومی اسمبلی، سینیٹ اور چاروں صوبائی اسمبلیوں میں صدر کے انتخاب کے لیے پولنگ ہوئی تھی۔
صدر مملکت کے انتخاب میں آصف زرداری کو 411 الیکٹورل ووٹ ملے تھے، جبکہ ان کے مدمقابل سنی اتحاد کونسل کے امیدوار محمود اچکزئی 180 الیکٹورل ووٹ حاصل کر سکے تھے۔
