بھارت کے معروف اداکار سنجے دت یہ اعلان تو پہلے ہی کرچکے ہیں کہ وہ فلم ہیرا پھیری 3 میں ایک انوکھے کردار میں سامنے آئیں گے تاہم وہ رول کون سا ہوگا اس پر انھوں نے پردہ ہی رکھا تھا جو اب اٹھا دیا گیا ہے۔
بھارتی میڈیا کے مطابق سنجے دت نے بتا دیا ہے کہ وہ ہیرا پھیری 3 کس روپ میں جلوہ گر ہوں گے۔ قبل ازیں معروف اداکار نے ایک پریس کانفرنس کے ذریعے اس بات کی تصدیق کر دی تھی کہ وہ اس فلم میں ایک نئے کردار کے ساتھ نظر آئیں گے۔
سنجے دت نے انکشاف کیا ہے کہ اس نئی آنے والی فلم میں ایک ایسے انڈرورلڈ ڈان کا کردار نھائیں گے جو نابینا ہوگا۔ فلم کی شوٹنگ اسی سال شروع کی جائے گی۔
فرہاد سمجی کی ہدایت کاری میں بننے والی فلم ہیرا پھیری 3 میں کارتک آریان بھی ہوں گے جبکہ پریش راول پہلے ہی اس بات کی تصدیق کر چکے ہیں کہ وہ اپنے مشہور کردار بابو بھیا کو دوبارہ پیش کریں گے۔
سنجے دت کا کہنا ہے کہ وہ اس فلم کی ٹیم کے ساتھ کام کرنے کے لیے بہت پرجوش ہیں کیوں کہ ان تمام کرداروں کے ساتھ ان کا رشتہ بہت پرانا ہے۔
ہیرا پھیری سیریز کی پہلی فلم پریا درشن نے ڈائریکٹ کی تھی جو سنہ 2000 میں ریلیز ہوئی تھی۔ مذکورہ فلم کی دوسری قسط نیرج ووہرا نے لکھی اور انھوں نے ہی ہدایت کاری کے فرائض بھی انجام دیے۔ ہیرا پھیری 2 سنہ 2006 میں ریلیزہوئی تھی۔
