اینٹی نارکوٹکس فورس (اے این ایف) نے ملک بھر میں کارروائیاں کرتے ہوئے 1750 کلو گرام سے زیادہ منشیات اور 25000 نشہ آور گولیاں برآمد کرکے 8 ملزمان کو گرفتار کرلیا۔
اینٹی نارکوٹکس فورس (اے این ایف) کے ترجمان کی طرف سے جاری بیان کے مطابق بیرون ملک جانے والی ایک خاتون مسافر سے اسلام آباد ایئرپورٹ پر 25 ہزار نشہ آور گولیاں برآمد ہوئیں۔
مزید پڑھیں
ایک اور کارروائی میں سیالکوٹ کوریئر آفس سے یونان بھیجے جانے والے پارسل سے 2.2 کلو گرام آئس برآمد کی جب کہ قلعہ عبداللہ میں ٹوبہ اچکزئی سے 1425 کلو گرام چرس برآمد کی گئی ادھر ویسٹرن بائی پاس کوئٹہ کے قریب گرفتار 2 ملزمان سے 225 کلو گرام چرس برآمد کر لی گئی۔ نوکنڈی چاغی کے علاقے سے 100 کلو گرام افیون اور گوادر سے 45 کلو گرام چرس برآمد کی گئی۔
ترجمان کے مطابق آر سی ڈی روڈ حب کے قریب گرفتار ملزم کے قبضے سے 3 کلو گرام چرس برآمد ہوئی۔ ڈیرہ غازی خان میں سخی سرور روڈ پر گرفتار 3 ملزمان سے ڈیڑھ کلو آئس برآمد کر لی گئی۔
ترجمان نے مزید بتایا کہ نیشنل ہائی وے حیدر آباد سے پکڑے گئے ملزم کے قبضے سے 300 گرام آئس برآمد کی گئی۔ تمام گرفتار ملزمان کے خلاف اینٹی نارکوٹکس ایکٹ کے تحت مقدمات درج کر لیے گئے ہیں جبکہ مزید تفتیش جاری ہے۔
