تاریخ میں پہلی مرتبہ کانز فلم فیسٹول نے سعودی فلم ’نورہ‘ کو 77 ویں ایڈیشن میں نمائش کے لیے پیش کرنے کا اعلان کر دیا ہے۔
کانز فلم فیسٹول 14 سے 24 مئی تک جاری رہے گا۔سعودی ہدایات کار توفیق الزیدی کی فلم کی پہلی بار نمائش گزشتہ برس ریڈ سی انٹرنیشنل فلم فیسٹول کے تیسرے ایڈیشن میں کی گئی تھی جسے العلا ایوارڈ کے لیے بہترین فلم قرار دیا گیا تھا۔
کانز فلم فیسٹول کے ڈائریکٹر فریماکس نے اسے ایک ’تاریخی لمحہ ‘ قرار دیتے ہوئے کہا کہ’ فلم ’نورہ‘کی نمائش ہمارے لیے باعث اعزاز ہے۔اس سال کے ایڈیشن میں شامل فلموں کا اعلان کرتے ہوئے کانز فیسٹول کے ڈائریکٹر فریماکس نےسعودی عرب میں ریڈ سی فلم فیسٹول کو سراہتے ہوئے کہا کہ ’فلم سازی کی صنعت کی اہمیت اجاگر ہوتی ہے‘۔
فلم کی کہانی ایک لڑکی ’نورہ‘کے گرد گھومتی ہے، ’نورہ‘اپنا زیادہ تر وقت دور دراز گاؤں میں گزارتی ہے۔ پھر ایک نیا استاد اس گاوں میں آتا ہے اور ’نورہ‘اس سے بہت متاثر ہوتی ہے۔ یہ استاد ’نورہ‘کو گاؤں سے باہر امکانات کی ایک وسیع دنیا سے متعارف کراتا ہے۔
ریڈ سی فلم فاونڈیشن کے بورڈ آف ٹرسٹیز کی چیئرپرسن جمانا راشد الراشد نے کانز فلم فیسٹول میں فلم ’نورہ‘ کے انتخاب کو سعودی عرب میں فلم سازی کے میدان میں مملکت کی صلاحیتوں کا اعتراف قرار دیا ۔
ان کا کہنا تھا کہ جب ہم نے پہلی بار فلم ’نورہ‘میں اسکرین پر جمالیاتی مناظر کو دیکھا تو ہم حیران رہ گئے تھے، فلم کا انتخاب یقینا ایک مثالی کامیابی کی دلیل ہے۔ ریڈ سی فلم کمپنی کے سی ای او محمد الترکی کا کہنا تھا ’کمپنی کی جانب سے کی جانے والی کوششوں کی کامیابی کا ثمر سوسائٹی کے سامنے ہے۔
