عوامی گورنر ہوں، علی امین گنڈاپور کو کھانے کی دعوت دیتا ہوں، فیصل کریم کنڈی

گورنر خیبر پختونخوا فیصل کریم کنڈی نے کہا ہے کہ میں عوامی گورنر ہوں، ہر سیاسی جماعت کے رہنما کے پاس خود چل کر جاؤں گا۔ وزیراعلیٰ علی امین گنڈاپور کو کھانے کی دعوت دیتا ہوں، وہ جب آنا چاہیں گورنر ہاؤس کھلا ہے۔

ملتان میں صحافیوں سے گفتگو کرتے ہوئے فیصل کریم کنڈی کا کہنا تھا کہ میں پارٹی کے اعتماد کا شکریہ ادا کرتا ہوں، ہمیں اپنا مقدمہ اپنے فورم پر لڑنا چاہیے، میں سب کو عزت دیتا ہوں۔ مولانا فضل الرحمٰن کہتے ہیں کہ ان کے مینڈیٹ پر ڈاکا ڈالا گیا تو خیبرپختونخوا میں تو مینڈیٹ سنی اتحاد کونسل کو ملا ہے، تو سنی اتحاد کونسل کو چاہیے کہ مولانا کے تحفظات دور کرے۔

ان کا کہنا تھا کہ خیبرپختونخوا کی صورتحال مٰن بہتری کے لیے تمام سیاسی جماعتوں کو ملنا ہوگا، آپ (وزیراعلیٰ کے پی کے) لفظی جنگ کا خواب پورا کریں لیکن وہاں کے عوام کو ڈیلیور  بھی کریں۔ جو چیزیں خیبر پختونخوا میں اچھی ہیں وہ دوسرے صوبوں کو لینی چاہئیں اور جو چیزیں دوسرے صوبوں کی اچھی ہیں اسے خیبر پختونخوا کو اپنانا چاہیے۔

گورنر خیبر پختونخوا کا کہنا تھا کہ میں چاہتا ہوں کہ خیبر پختونخوا میں ایس آئی یو ٹی جیسے اسپتال بنیں، یہاں کسان کارڈ ملے، یہاں اچھا مقابلہ ہونا چاہیے۔ گالم، گلوچ کی سیاست کا ابھی وقت نہیں، ابھی عوام کی خدمت کا وقت ہے، ہمیں ان کی خدمت کرنی ہے۔