کھجور : غذائیت سے بھرپور سپر فروٹ

کھجور ایک ایسا پھل ہے جسے ایک سادہ اور مکمل غذا کے طور پر جانا جاتا ہے۔ جب کہ ماہِ صیام میں کھجور سے افطار اس کی غذائی افادیت کو دو چند کر دیتا ہے۔ کھجور میں درج ذیل خوبیاں پائی جاتی ہیں:

۔ یہ غذائیت سے بھرپور ہوتی ہے

۔ اس میں مختلف قسم کے اینٹی آکسیڈینٹ پائے جاتے ہیں۔

۔ کھجور میں موجود اجزا ہاضمہ درست رکھنے میں مددگار ہوتے ہیں

۔ کھجور میں موجود مختلف غذائی عناصر دل و دماغ کو تقویت دیتے ہیں

فائبر اور پروٹین سے بھرپور:

غذائی ماہرین کے مطابق تین کھجوریں تقریباً 200 کیلوریز اور 54 گرام کاربوہائیڈریٹس فراہم کرتی ہیں۔ جس میں تقریباً پانچ گرام فائبر اور ایک گرام پروٹین ہوتا ہے، جب کہ اس میں چکنائی نام کو بھی نہیں ہوتی۔

کیا کھجور ’شوگر بم‘ ہے؟

عام طور پر کھجور کی بھرپور مٹھاس کے باعث اسے ’شوگر بم‘ اور  محض کیلوریز کا حامل سمجھا جاتا ہے، جب کہ حقیقتاً کھجور میں وٹامن بی، وٹامن کے ، کیلشیم ، آئرن،  میگنیشیم، پوٹاشیم اور زنک کی مخصوص مقدار موجود ہوتی ہے۔ اس کے علاوہ اس میں مختلف قسم کے اینٹی آکسیڈنٹس بھی ہوتے ہیں۔

تحقیق کیا کہتی ہے؟

2019 میں کی جانے والی ایک تحقیق کے مطابق کھجور قدرتی اینٹی آکسیڈنٹس کا ایک اچھا ذریعہ ہے، جو آکسیڈیٹیو تناؤ سے متعلق بیماریوں کی روک تھام میں معاون ہوتے ہیں۔

واضح رہے کہ آکسیڈیٹیو تناؤ اس وقت ہوتا ہے جب سیل کو نقصان پہنچانے والے فری ریڈیکلز کی پیداوار اور ان کے نقصان دہ اثرات کا مقابلہ کرنے کی جسم کی صلاحیت کے درمیان عدم توازن پیدا ہوجاتا ہے۔

یہ عمر بڑھنے اور سیل کو پہنچنے والے نقصان کا پیش خیمہ ہے، جو بیماری کا باعث بن سکتا ہے۔ کھجور میں سوزش اور جراثیم کُش مرکبات بھی ہوتے ہیں، جس کا مطلب ہے کہ وہ متعدی بیماریوں سے لڑنے میں بھی کردار ادا کر سکتے ہیں۔

کھجور کی مٹھاس اور انرجی بار:

2017 کی ایک تحقیق کے مطابق کھجور میں بہت سے اینٹی آکسیڈنٹس ہوتے ہیں، جن میں کیروٹینائڈز، پولی فینولز ، ٹیننز اور سٹیرولز شامل ہیں۔ اس کے علاوہ اس میں اینٹی فنگل خصوصیات بھی ہوتی ہیں۔

عام طور پر لوگ کھجور کو ایک خشک پھل سمجھتے ہیں جب کہ حقیقت میں یہ کسی تازہ پھل سے کم نہیں ہے، اس لیے کہ اس میں سے پانی نہیں نکالا جاتا۔چونکہ کھجور غیر پروسس شدہ پھل ہے اس لیے ان میں چینی کی مقدار قدرتی طور پر موجود ہوتی ہے۔ دوسرے لفظوں میں اگر انرجی بار کو صرف کھجور کے ساتھ میٹھا کیا جاتا ہے، تو لیبل صفر گرام اضافی چینی درج کر سکتا ہے۔

امریکی ڈاکٹرز کی تجویز:

امریکن ہارٹ ایسوسی ایشن (اے ایچ اے) نے تجویز کیا ہے کہ خواتین روزانہ چائے کے چھے چمچ سے زیادہ چینی نہ کھائیں، جو کہ 25 گرام یا 100 کیلوریز کے برابر ہے۔ مردوں کے لیے تجویز کردہ مقدار نو چائے کے چمچ چینی ہے، جو کہ 36 گرام یا 150 کیلوریز ہے۔ایسے میں اگر آپ کھجور استعمال کرتے ہیں تو اس کا مطلب یہ ہے کہ آپ نے اپنے یومیہ اضافی چینی کے بجٹ میں سے کچھ بھی استعمال نہیں کیا۔

ہاضمے کے لیے مفید:

تین کھجوریں جسم کے لیے فائبر سے متعلق روزانہ کے اہداف کا تقریباً 18 فیصد فراہم کرتی ہیں، جو ہاضمہ کے لیے بہترین ہے۔

کھجور میں موجود حفاظتی مرکبات دماغ کی حفاظت میں بھی مدد دیتے ہیں۔ 2016 میں شائع ہونے والے ایک مقالے کے مطابق کھجور دماغ میں سوزش اور آکسیڈیٹیو تناؤ کا مقابلہ کرنے کی صلاحیت کی وجہ سے الزائمر کی بیماری کے خلاف مدافعت فراہم کرتی ہے۔

کھجور کے فائدے ہی فائدے:

کھجور ایک سپر فروٹ ہے جو دماغ، نظام ہاضمہ اور دل کو بہت سے فوائد فراہم کرتی ہے۔ یہ مزیدار پھل اینٹی آکسیڈینٹ ہے اس کو دلیے جیسی ترکیبوں میں میٹھے کے طور پر استعمال کریں یا انہیں ویسے کھائیں یہ ہر دو صورتوں میں فائدہ مند ہوتی ہے۔