سپریم جوڈیشل کونسل میں ججز کیخلاف زیرالتوا شکایات کے فیصلے جلد کیے جائیں، چیف جسٹس کو خط ارسال

میاں داؤد ایڈووکیٹ کی طرف سے چیئرمین سپریم جوڈیشل کونسل، چیف جسٹس قاضی فائز عیسیٰ کو خط ارسال کیا گیا ہے، جس میں کہا گیا ہے کہ سپریم جوڈیشل کونسل میں ججز کے خلاف زیر التوا شکایات کے فیصلے جلد کیے جائیں۔

خط کے مطابق کہا گیا ہے کہ چیف جسٹس نے 21 جنوری کو بتایا تھا کہ کونسل میں ججز کے خلاف 100 شکایات زیر التوا ہیں، 4 ماہ سے سپریم جوڈیشل کونسل میں ججز کے خلاف شکایات پر کارروائی نہیں ہوسکی۔ 4 ماہ سے مخصوص گروہ نے سپریم جوڈیشل کونسل کے ممبران کو نان ایشوز میں الجھا رکھا ہے۔

خط میں کہا گیا ہے کہ نان ایشوز میں الجھنے کی وجہ سے ججز کے خلاف شکایات پر کارروائی رکی ہوئی ہے، 190 ملین پاؤنڈ سرکاری خزانے میں جمع کرانے کے فیصلے کے دن سے مخصوص گروہ متحرک ہے، 190 ملین پاؤنڈ بارے سپریم کورٹ کے فیصلے کے دن سے مخصوص گروہ سازشیں کر رہا ہے۔

میاں داؤد ایڈووکیٹ نے لکھا کہ یہ مخصوص گروہ نہیں چاہتا ہے کہ سپریم جوڈیشل کونسل ججز کے خلاف شکایات پر مزید کارروائی کرے، مخصوص گروہ چیف جسٹس قاضی فائز عیسی کی ریٹائرمنٹ تک کونسل کو غیرفعال رکھنا چاہتا ہے، چیف جسٹس قاضی فائز عیسیٰ نے آئین و قانون کے مطابق فیصلے کئے ہیں۔

خط کے مطابق آئین و قانون اور جمہوریت کی بالا دستی کرنے کی وجہ سے جسٹس قاضی فائز عیسی کا نام سنہرے حروف میں لکھا جائے گا۔ ماضی میں چیف جسٹس صاحبان کرپٹ ججز کو تحفظ فراہم کرتے رہے ہیں۔ عوام سمجھتے ہیں کہ ججز کا احتساب صرف چیف جسٹس قاضی فائز کے دور میں ہی ممکن ہوسکتا ہے۔

خط میں کہا گیا ہے کہ سپریم جوڈیشل کونسل میں ججز کے خلاف شکایات کو جلد از جلد نمٹایا جائے، سپریم جوڈیشل کونسل میں ججز کے خلاف شکایات پر روزانہ کی بنیاد پر سماعت کی جائے۔