میٹا کا انسٹنٹ میسجنگ پلیٹ فارم واٹس ایپ ایک نئے فیچر پر کام کر رہا ہے جس کو استعمال کرتے ہوئے صارفین مصنوعی ذہانت سے بنی پروفائل فوٹو لگا سکیں گے۔ اے آئی سے چلنے والا پروفائل پکچر جنریٹر صارفین کے مزاج، شخصیت یا رجحان کو منعکس کرتی تحریر پر مبنی تصاویر بنائے گا۔
واٹس ایپ سے متعلق نئی معلومات فراہم کرنے والے بیٹا انفو کے مطابق اے آئی کو واٹس ایپ صارفین کی طرف سے ایک پرامپٹ دیا جائے گا اور وہ اپنی پسند کی تصویر بیان کریں گے۔ پھر اے آئی فراہم کردہ معلومات کی بنیاد پر اپنی مرضی کے مطابق پروفائل تصویر بنائے گا۔
مزید پڑھیں
واٹس ایپ اے آئی کا نام ابھی ظاہر نہیں کیا گیا ہے لیکن ایپ اپریل 2024 میں پہلے ہی میٹا اے آئی کو اپنے پلیٹ فارم میں ضم کر چکی ہے۔ واٹس ایپ بیٹا نے صارف کی پرائیویسی پر اس فیچر کے اثرات کے بارے میں کہا کہ ہماری رائے میں، یہ فیچر صارف کی پروفائل کی رازداری کو بڑھا دے گا۔
مصنوعی ذہانت سے تیار کردہ تصاویر کا استعمال کرتے ہوئے، صارفین حقیقی تصاویر شیئر کرنے سے گریز کرسکیں گے، جس سے ان کی تصاویر کے غلط استعمال یا غیر مجاز شیئرنگ کا خطرہ کم ہو سکتا ہے، حالانکہ پروفائل فوٹوز کے اسکرین شاٹس کو روکنے کا فیچر پہلے ہی اس صورتحال کے لیے ایک اچھا اضافہ ہے۔
اس کے علاوہ، ہمیں یقین ہے کہ یہ فیچر اس وقت کارآمد ثابت ہو سکتا ہے جب صارفین کو یقین نہ ہو کہ کون سی تصویر استعمال کرنی ہے۔ وقت گزارنے، تلاش کرنے یا کامل تصویر لینے کے بجائے، صارف صرف ایک پرامپٹ فراہم کرکے ایک تصویر بنا سکتے ہیں۔
واٹس ایپ بیٹا انفو کے مطابق کمپنی نے یہ نیا فیچر آزمائش کے لیے ایپ کے اینڈرائیڈ بِیٹا ورژن 2.24.11.17 میں متعارف کرایا ہے۔ یہ فیچر ان افراد کے لیے مفید ہوگا جو پروفائل پکچر میں اپنی تصویر استعمال کرنے سے گریز کرتے ہیں۔
واٹس ایپ بیٹا انفو کے مطابق صارفین پروفائل پکچر سیٹنگز میں ایڈٹ آئیکون کو کلک کرکے کو اس فیچر تک رسائی حاصل کر سکیں گے۔ تاہم، واٹس ایپ ممکنہ طور پر اس فیچر کے لیے ایک مخصوص ٹیب متعین کرے گا۔
واضح رہے یہ فیچر فی الحال آزمائشی مراحل میں ہے اور اس کے اجراء کے متعلق فی الحال کسی حتمی تاریخ کا اعلان نہیں کیا گیا ہے۔
